Iro hinungdan nga puya nga buhi sud sa plastic napalgan

BUHI nga puya nga gisulod og plastic bag ang napalgan duol sa kasagingan ug kakahoyan sa Barangay Maya, lungsod sa Daanbantayan niadtong Miyerkules sa buntag.

Daw sa gikumot ang dughan ni Tephanie Niña Arreglo Dublin nga maoy nakakita sa bata nga lalake nga gibanabana nga pito ka buwan, kansang pusod ang wala pa maputol ug aduna pay inunlan, nga gibilin luyo sa gate sa ilang balay sa naasoy nga dapit.

Si Heide Aplece, municipal social welfare and development officer sa Daanbantayan, niingon nga stable ang kahimtang sa bata sud sa intensive care unit sa Vicente Sotto Memorial Medical Center (VSMMC) sa dakbayan sa Sugbo.

Si Dublin, 25, pharmacy assistant ug dunay 5-anyos nga anak nga babaye, niasoy nga Martes sa gabii nahibung sila nganong nagsige og paghot ang iro luyo sa gate sa ilang balay.

Pagka buntag sa Miyerkules dihang padung na unta siya motugway sa kanding, ang ilang iro nagsige gihapon og paghot ug nakadungog siya og hilak nga una niyang gituohan nga iring sa iyang anak ang naghilak.

Dihang iyang giduol ang gigikanan sa tingog sa hilak, iyang nakit-an ang bata nga gisulod og plastic nga wala pa maputol ang pusod ug may inunlan luyo sa ilang gate.

“Gikumot akong dughan nakakita sa bata kay naa sad baya koy anak nga babaye ug manghod. Gitarong unta sa inahan, luoy kaayo ang bata nga gilabay lang unya ang uban maglisod gani og panganak,” asoy ni Dublin sa pakighinabi sa Superbalita Cebu kagahapon.

Sa pagkakita sa bata nga nanglagom na ang nawong, dali siya nipakyaw og habalhabal ug gidala ang puya sa Rural Health Unit aron matabang ug malimpiyohan sa wa pa gidala sa Daanbantayan District Hospital.

Pag-abot sa ospital, gitabang ang bata ug gihatagan og antibiotics ug gi-dextrose.

Tungod sa kahimtang sa bata nga kulang sa buwan, gibalhin kini sa VSMMC pagka Huwebes sa gabii ug anaa karon sa ICU nga padayon giobserbahan sa mga doktor.

Si Dublin, anak og midwife sa lungsod, niingon nga kon siya ang mohatag og pangan sa bata, nganlan niya kini og Vicente Ferrer, tungod kay kang San Vicente Ferrer siya nag-ampo aron maluwas ang bata diin naatol usab nga nagsaulog sa kapistahan sa maong santos ang ilang silingan nga dakbayan sa Bogo.