306 PUSHERS, USERS MITAHAN
70 sa Cebu City; 146 sa Mandaue; 30 sa Consolacion; 50 sa Carcar; 10 sa Naga
PADAYONG nagbaha ang mga tawo nga nalambigit sa illegal drugs sa buhatan sa kapulisan dinhi sa Sugbo human moasumer sa katungdanan si Presidente Rodrigo Duterte.
Kagahapon, 306 ka mga drug pusher ug users ang ningsurender.
Sa Cebu City 70; Mandaue City, 146; 30 sa Consolacion; 50 sa Carcar City; ug 10 sa Naga.
Ang sobra sa katunga nga nangsurender sa Cebu City gikan sa Suba samtang ang uban sa Pasil, Sawang Calero, Calamba ug San Nicolas Proper.
“Nahadlok na ko. Dako pa ko og pangarap sa akong kaugalingon,” matod ni Elmer, 16, tinun-an sa 4th year high school sa usa ka publikong tunghaan nga taga dan A. Lopez, Brgy. Calamba, siyudad sa Sugbo nga namaligya na og drugas bisan sa kalinghod sa iyang pangidaron.
Giangkon niya nga di siya mogamit og drugas ug igo rang mamaligya aron maoy gamiton sa iyang pageskwela ug sa iyang igsuon.
Matod ni Sr. Insp Alejandro Lopez, deputy chief sa station 6 nga resulta ni sa ilang gihimong Oplan Tukhang niadtong Sabado sa unom ka mga barangay nga sakop sa ilang police station.
Kini naglangkob sa Sawang Calero, Calamba, Suba, Pasil, San Nicolas Proper ug Pahina San Nicolas diin ilang gipang tuktok ang mga drug personality sa maong mga barangay.
“Ang amo diri aron ma clear sila. Pasabton namo nga dili lang kay nagpa clear sila ngari nga clear na gyud sila. Amo gihapon nang monitoron kon nag bag-o ba gyud sila,” matod ni Lopez.
Si Kapitan Jojo Sabli sa barangay Suba nagkanayon nga duna siyay kapin sa 40 ka mga drug user ug pushers ang mitahan tungod sa kahadlok.
Matod ni Lopez nga kutob sa Hulyo 15 ang ilang pagpanawat sa mga gustong motahan ug kon molapas na, mohimo sila og anti drug operations.
Sa dakbayan sa Mandaue, pormal nga gipresentar ang mga tawo nga nalambigit sa drugas ngadto nila ni Kongresista Jonas Cortes sa Sixto Distrito ug Bise-Mayor Carlo Fortuna sa Mandaue City Sports and Cultural Complex mga alas 9 sa buntag.
Matod ni PSupt. Jonathan Abella, deputy city director for administration of Mandaue City Police office (MCPO) nga 131 ang unang gipresenta kagahapon nga mao ang kinatibuk-ang gidaghanon sa nisurender sa kapulisan sukad nga gisugdan sa MCPO ang Oplan Tukhang sa dakbayan.
Wa pay labot niini kadtong bag-o lang naabot samtang nagpadayon ang programa nga nidala sa tanan ngadto sa 146.