Bag-ong hepe sa PRO 7 mibahad
NILINGKOD na ang bag-ong Police Regional Office 7 director hulip sa Sugboanon nga heneral nga si Chief Supt Patrocinio Comendador nga nakaserbisyo lang og dul-an tulo ka buwan.
Si Chief Supt Noli Taliño, kanhi hepe sa Special Action Force, maoy napili ni PNP Chief Police Director General Ronald Bato Dela Rosa nga mangulo sa kapulisan sa tibuok rehiyon 7.
Sa iyang mensahe, si Taliño niingon nga tulo ka mga programa ang iyang gustong himuon dinhi.
Kini mao ang pagpuhag sa ilegal nga drugas, kriminalidad ug kurapsyon sud sa PNP organization.
Lakip sa iyang patutokan ang mga scalawag nga mga pulis sa rehiyon nga nalambigit sa ilegal nga kalihukan.
Matod niya nga nasayod siya nga dunay listahan ang PRO 7 sa mga pulis nga nalambigit sa ilegal nga kalihukan.
“Mayron kayang police sa region 7 sa ilegal na druga? Kung mayron, ito ang aking panawagan sa inyo, you better stop now. When I say, now, ngayon. Karon, itigil nyo na” kini ang pintok nga pamahayag ni Taliño.
Bahad niya sa maong mga badlungong police nga iyang ipagukod sa mga kauban niining pulis nga nagtinarong sa trabaho.
Samtang si Gobernador Hilario Davide III niingon nga naguol siya sa pagkahulip ni kanhi PRO 7 Director Patrocinio Comendador.
Alang sa gobernador, katungod sa bag-ong hepe sa Philippine National Police nga si Director General Ronald “Bato” Dela Rosa ang paglahugay sa iyang mga sakop labi na bag-o usab ang presidente sa nasod nga si Rodrigo Duterte.
Siya nibutyag nga nitext niya si Comendador sa miaging semana nga nagpahibawo nga hulipan na siya sa puwesto ug iya kining gipasalamatan sa maayong pagdumala sa kapulisan sa rehiyon labi na sa Sugbo.