Metro Cebu nangandam ni `Butsoy’
LOKAL nga mga kagamhanan sa Metro Cebu alerto sa nagpadung nga bagyong Butsoy nga bisan di moagi sa yuta, gipaabot nga moapekto tungod kay nagdala og uwan.
Gialerto sa Cebu City Government ang lainlaing mga buhatan aron sa pagtubag kon dunay mga emerhensiya nga motumaw.
Base sa forecast sa Philippine Atmospheric Geophysical Astronomical Services Administration (Pagasa) nga mikusog ang bagyong dunay international codename Nepartak.
Kon mosulod kini sa Pilipinas, tawgon kini og Butsoy.
Kagahapon sa hapon, duna na kiniy gikusgon nga 85 kilometros matag oras.
Pagasa mipahimangno nga tungod sa pagsagol sa hangin nga Habagat, dako ang kahigayunan sa pagbunok sa uwan.
Si Nagiel Bañacia, public information officer ug pangulo sa Local Disaster Risk Reduction and Management Office nagkanayon nga naka- heightened alert ang Dakbayan sa Sugbo.
Ilang gipaandam ang General Services Office, Department of Engineering and Public Works, Department of Social Welfare and Services (DSWS) ug ang Local Disaster Risk Reduction Management Office (LDRRMO0.
Matod pa ni Bañacia nga gipaandam na ang mga heavy equipment nga gidestino sa kabukiran nga maoy kanunay mohawan sa mga dalan kon dunay modahili nga yuta ug pagpangatumba sa kahoy aron di mababagan ang mga karsada.
Kon adunay mga pamilya nga walay makaon gumikan sa kalamidad, anaa ang presensiya sa DSWS ug ang GSO para makapadala og mga sakyanan ug logistics.
Gitug-an sa pangulo sa LDRRMO nga adunay 30 ka mga personnel nga gipuno alang sa quick response team ug laing lima ka mga tawo gikan sa Emergency Rescue Unit Foundation nga husto og mga training sa bisan unsa nga matang sa katalagman naka-standby.
Mopakatap sila og mga bus agad sa panginahanglan sa dagkong mga karsada sa Siyudad.
Samtang, gipaniguro ni Mandaue City Risk Reduction and Management Officer (CDRRMO) Felix Suico nga andam na ang iyang mga kawani pagtubag sa emerhensya.
Gipasalig usab niya nga igo ang mga ekipo sa CDRRMO sa pagtubag og alarma.
Risgo sa pagbaha ang dakbayan ilabi kon kusog ang uwan susama niadtong Biyernes.
Matod ni Suico nga siyam sa 27 ka mga barangay ang bahaanan.
Kini mao ang mga barangay sa Tipolo, Subangdaku, Guizo, Mantuyong, Looc, Cambaro, Umapad, Paknaan ug Cubacub.
Gilakip nila sa pagpaandam ang mga biktima sa sunog kinsa kasamtangang nanimuyo sa Cebu International Convention Center CICC.