P200 M nga mga heavy equipment gibaraw ni Davide

MIMANDO si Gobernador Hilario Davide III sa Provincial Bids and Awards Committee (BAC) sa lalawigan sa Sugbo nga usbon ang pagpahigayon og bidding alang sa pagpalit og heavy equipment.

Ang gobernador mingdeklarar og failure of bidding sa pagpalit og P200 milyones nga balor sa heavy equipment atol sa iyang pakigpulong sa pagbukas sa session sa ika-14 nga Sangguniang Panlalawigan sa Sugbo kagahapon.

Si Davide nipasabot nga ubos sa balaod gihatagan siya og pagtugot nga usbon ang bidding o balibaran alang sa interes sa publiko human nitumaw ang pasangil nga dunay gipaboran ang PBAC nga supplier og heavy equipment ug giingong gipaburot ang presyo sa pagpalit niini.

“Tungod aning mga you know malisyusong accusations before nga overpriced... I believe nga kining akong decision for the higher public interest,” pahayag sa gobernador ngadto sa mga tigbalita human sa inaugural session.

Matod niya mahimong makaapil og balik ang mga contractor nga wa makadaug sa unang bidding.

Nakontrobersiyal ang bidding dihang gipili sa PBAC ang ConEquip Philippines, Inc. nga maoy hatagan sa award alang sa pagpalit og bidding, bisan og kini ang adunay labing taas og presyo kon itandi sa ubang mga contractor nga niapil usab sa bidding.

Sa iyang pakigpulong sa inaugural session, nangayo og suporta ug kooperasyon ang gobernador sa bag-ong hugpong sa 14th SP alang sa pagpatuman sa mga programa ug proyekto sa iyang administration sa iyang ikaduha nga termino.

Apil niini ang pagpalambo ug pagbutang og dialysis machines sa mga ospital nga gidumala sa lalawigan, libreng edukasyon sa kabataan ug dugang classroom sa kabarangayan, pagpauswag sa Farmer-Scientists Training Program (FSTP), ipadayon ang pagpalambo sa mga tugpahanan sa mga isla sa Bantayan ug Camotes, pagtukod og one-stop shop alang sa mga investor, paghimo og disaster ug climate change plans sa tanang 51 ka mga local government unit, ug pagpaligon sa kampanya batok sa illegal nga drugas ug ubang programa nga manalipod sa kabataan ug kababayen-an.

“Nanghinaot ko nga dili mamahimong babag ang nagkalainlaing natong gigikanan nga mga partido sa pagkab-ot sa atong hiniusang tinguha nga kauswagan sa matag Sugbuanon,” sumala ni Davide.

Si Bise Gobernador Agnes Magpale, presiding officer sa SP, niingon nga paningkamutan nila nga sa dili pa matapos ang 2016, makapanday na sila og mga ordinansa bahin sa Tourism Code of Cebu Province ug manalipod sa kabataan ug kababayen-an.

Siya niawhag sa iyang mga kauban sa SP nga mohimo og mga balaod nga makaayo sa kinabag-an.

“Let not our differences in political affiliations hinder our common and shared responsibility to serve the public,” dugang niya.

Ang SP nagdugang og usa ka komitiba, ang energy committee, nga panguluhan ni Bokal Glenn Bercede.