P4M marijuana nalarot
GIBANABANA nga P4 milyones ang kantidad sa mga punoan sa marijuana nga gipanglarot sa hiniusang puwersa sa kapulisan ug militar niadtong Sabado ug Dominggo sa mga Barangay Sunog ug Bayong, lungsud sa Balamban.
Si Chief Insp. Florendo Fajardo, hepe sa Balamban Police Station nga nahinabi sa Sun.Star Superbalita, niingon nga uban nila sa joint operation sila si 1st Lt. Dexter Raner sa 47 Infantry Batallion sa Philippine Army, SWAT Balamban ug kapitan Agustino Son sa Bayong.
Nadiskubrihan ang maong plantasyon sa marijuana human sa sila migamit sa drone device, o gamay nga eroplano nga gipalupad gamit ang remote control, sa pagsuhid sa kabukiran sa lungsud sa Balamban.
Gibutyag niini nga Sabado sa alas 4:00 sa kaadlawon uban sa ilang counterparts sa barangay opisyal ug asset sa army ilang unang gisuhid ang Barangay Sunog.
Gipanglarot nila ang 23,900 mil ka mga fully grown nga punoan sa Marijuana nga gipangtanom sa pangpang sa nahisgutang dapit nga gipataliwad-an sa kasagbutan ug kakahuyan.
Sumala sa kapulisan, ang maong mga marijuana mobalor sa P2,987,500 milyunes basi sa Dangerous Drugs Board (DDB) value.
Sa pagka Dominggo sa alas 5:00 sa buntag isuhid na usab nila ang kabukiran sa Barangay Bayong diin ilang nalarot ang 9,700 mil ka fully grown nga marijuana.
Ang maong arijuana mobalor kinig P1,212,500 milyunes base sa DDB- value.
Matud pa nga sa duha ka adlaw nilang operasyon naabtan sila’g hapon sa pagpangibot sa mga marijuana tungod sa kadaghan niini ingon man kalisod sa dapit.
Ang ubang mga marijuana nga wala na nila makarga gidauban nila didto sa dapit, samtang wala silay nadakpan nga nananom sa maong ilegal nga tanom.
Si Fajardo niingon nga dako ang posibilidad nga ang maong mga nananom taga diha lang sa lugar nga ilaha karong gisubay.
Gikataho nga maayong pagkaatiman ang mga marijuana kay dunay hose sa tubig nga giakutay busa nagduda sila nga taga diha sa lugar ang mga responsabli.