14th SB sa konseho sa siyudad sa Sugbo

ANG 14th Sangguniang Panlungsod (SB) sa dakbayan sa Sugbo mopahigayon sa ilang inagural nga sisyon karong hapon.

Masayran usab sa maong sisyon kon si kinsa ang mga opisyal nga maghupot og importanteng katungdanan sa mosunod nga tulo ka tuig sa ilang termino.

Aprobahan usab sa mga bag-ong magbabalaod sa dakbayan sa Sugbo ang bag-ong house rules nga ipatuman sama sa pagbalhin sa regular session ngadto sa matag adlaw nga Martes inay Miyerkules.

Si Bise Mayor Edgardo Labella, presiding officer sa konsehol, nagkanayon nga ala 1:00 sa hapon ipahigayon ang misa nga pagadumalaon ni Msgr. Roberto “Boy” Alesna ug pagka-alas 3:00 sa hapon isunod ang pormal nga sisyon.

Sila si Konsehal Joel Garganera ug Jerry Guardo kinsa pulos bag-o sa katungdanan nagkanayon nga adunay eleksyon nga ipahigayon sama sa pagpili kon si kinsa ang presiding officer pro tempore, majority floor leader, 1st assistant majority floor leader, minority floor leader ug assistant minority floor leader.

Isunod dayon ang eleksyon tali sa 18 ka mga sakop sa konseho lakip na ang bise mayor kon si kinsa kanila ang mahimong chairman, vice chairman ug mga miyembro sa kapin 20 ka mga komitiba ilawom sa konseho.

Usa ka konsehal nga dili lang magpahingan kinsa nahibawo kon unsay mahitabo karong adlawa niingon nga kon walay kausaban sa ilang nahiunang kasabutan, walay mga konsehal nga sakop sa Bando Osmeña Pundok Kauswagan (BOPK) ang makahupot og komitiba.

Gipadayag niya nga mahiaguman sa mga sakop sa BOPK ang ilang gibuhat sa mga konsehal sa Team Rama sa 13th Sanggunian diin walay bisan usa kanila ang gihatagan og komitiba dihang ang BOPK pa ang nag-mayoriya.

Apan si Mayor Tomas Osmeña una rang niingon nga dili angay mabalaka ang unom ka mga konsehal nga iyang alyado pinangulohan sa iyang asawa nga si Margot sanglit himuon kini niyang deputy mayors diin walay moabot nga dokumento sa iyang lamesa kon walay initial signature sa iyang mga konsehal.