Mangginukdanon man diay gihapon
ABI ba nako og nagbag-o na kining “kanhi laos nga pulitiko” nga nabalik karon sa pagka-mayor. Wala pa man diay gihapon ug nagpabilin man diay ang iyang kanhi abilibad nga arogante ug mangginukdanon. Matod pa lagi nila nga mas sayon pa usbon ang dagway sa tawo kay sa kina-iya niini. Naa na may plastic surgery karon ug laser para ma-usab ang imong dagway. Pero wala pay kahimanan nga na-imbento nga makapausab sa batasan ug karakter sa usa ka tawo. Mao na siya bisan gihatagan na og sakit sa Ginoo.
I-konsiderar nato kining kaso ni Rachel Arce, ang kanhi City Market Administrator ug hepe sa Prevention, Restoration, Order, Beautification, Enhancement (Probe) team sa administrasyon ni Mayor Mike Rama. Si Rachel, na- promote diha sa market authority gumikan sa iyang maayong performance ug paningkamot. Nakasulod siya sa City Hall panahon pa sa unang termino aning maong kanhi laos nga pulitiko. So, iya ning hiring.
Sa panahon ni Mike isip mayor, nakita niya ang potential o abilidad ni Arce busa iya kining gihatagan og importanteng posisyon isip market administrator. Ug gumikan sa iyang kaisog ug katakus pagdisiplina sa mga abusadong mga ambulant vendors ug mga squatters, gihatagan ni Mike og laing posisyon si Arce isip hele sa Probe. Epektibo si Rachel kay bisan daghan siya og gikabangga labi pa aning mga squatters ug mga sidewalk vendors, iya gihapon nga napatuman ang mandatu nga gisangon kaniya ni Rama.
Apan unsay gihimo aning bag-ong mayor karon? Iyang gigukod og gihimong miserable ang kinabuhi karon ni Arce. Kay dili man siya makatangtang kay regular employee man si Arce, iya kining gi-destino isip nightshift guard sa Dona Pepang cemetery. Susmaryosep! Wala lang ba gyud niya huna-huna nga babaye intawon na si Rachel unya i-destino og gabii unya anaa pa sa kritikal nga lugar pa gyud. Daghang mga boang diha sa Carreta. Unya ug naay magmulto diha? Siyaro og wala na niya gikonsiderar? Siguro iyang gilisud-lisud si Rachel aron mapugos pag- resign.
Kana si Arce dili man siguro na siya loyal ni Mike. Loyal na siya sa iyang trabaho ug propesyon. Kanang iyang loyalty si bisan kinsa man ang mahimong mayor diha, secondary o ikaduha ra na. Naay abilidad si Rachel ug posible nga makatabang pa na siya sa kasamtangang administrasyon karon kon hatagan og insaktong posisyon. Nganong dili man i- utilize o gamiton kanang iyang talento? Porbida ning pulitika, pagkawala gyuy hinungdan. Hoy, pag-usab na uy. Gihatagan naka og sakit sa Ginoo.