Ang gahum sa NPA?

SAMTANG saludo kita niining kaagresibo karon sa administrasyon ni Presidente Rodrigo “Digong” Duterte sa pagsugpo ning grabing pagkatap sa gidiling drugas sa nasod, duna usay mga punto nga angay natong hinuklogan ug ikabalaka ning pipila niya ka mga palisiya.

Ning bag-o lang, ang Communist Party of the Philippines (CPP) pinaagi sa ilang armed wing nga New People’s Army mipadayag sa ilang pagsuporta sa kampanya batok sa gidiling drugas.

Sama sa kapulisan agresibo usab sila nga molusad og subsob nga pagpangronda sa mga dapit ilabi na sa probinsiya ug kabukiran nga gidudahang naghitak ang mga gidiling drugas.

Niadtong Dominggo, 70 ka mga armadong tawo ang miatake didto sa Governor Generoso police station sa Davao Oriental ug gidagit ang hepe niini nga si Insp. Arnold Ongachen.

Apan si Duterte mibutyag nga dili siya makignegotiate nga ma release si Ongachen kinsa giingon nga nalakip sa pagpayuhot sa gidiling drugas. Matod niya nga anaa ra sa mga NPA kon unsay ilang buhaton niini kay aduna man silay kanggaroo court.

Kini maoy kuyaw kay mora na man ni hinuon og nahimo na tang free-for-all nga panggobiyerno.

Tiaw mo bay hasta ang rebelding komunista sa nasod gitugotan na usab diay ni Digong sa pagpanakop sa mga kriminal.

Ug kon tinuod man nga nagnegusyo og gidiling drugas, nganong di man ang legal nga pamunoan maoy mosilot ni Ongachen nga ipaagi og due process?

Kon mao ni magpermi, dili na unya nato ikasurprisa nga ang mga NPA aduna na unyay ilang kaugalingong syudad o lungsod sa nasod kay sila na man unya ang magkontrolar. Unya uyon ta ani?