Miduyog ang panahon sa Encantadia
DAKO ang pasalamat sa cast sa bag-ong “Encantadia” sa mga Cebuano ug sa maayong panahon nga gihatag sa haring adlaw niadtong Dominggo nga maorag niduyog sad sa ilang Kapuso Mall Show sa South Town Centre sa Talisay City.
Full-force ang mga Sang’res sa Encantadia nga silang Kyle Padilla, Gabbi Garcia, Sanya Lopez ug Glaiza de Castro kauban silang Roco Nacino ug Ruru Madrid ug si Direk Mark Reyes nga apil sa nipaambit sa mga exciting nga kalamboan sa Encantadia atol sa presscon didto sa Golden Cowrie sa Lahug nianang pagkaudto.
KANUS-A MAGSUGOD?
Gisiguro ni Direk Mark Reyes nga mas -action-packed ug mas eksplosibo karon ang requel (retelling-sequel) sa Encantadia nga magsugod kon wa ko masayup karong Hulyo 18 na sa GMA telebabad sa primetime.
Wala siya motug-an sa eksaktong petsa kay ang 24 Oras kuno ang moanunsyo niini apan karon gyung buwana. Nakahimo na sila og bale upat ka semana nga episode.
“Mag-uumpisa siya nina Marian Rivera ug Dingdong Dantes at sa mga bata pa na sina Kylie, Gabbi, Senya at Glyza,” ni Direk Mark bahin sa kinadak-ang fantaserye karong tuiga sa GMA.
STEPHANIE CONCERT
Excited sad si Ms. Aida Patana sa upcoming first solo major concert sa iyang anak nga si Stephanie kay ang mga season nga musikero sa Sugbo ang moduyog nga live band ug ang sound system pinaka da best ang ilang gikuha. Ug dili lang basta guesting ang buhaton sa iyang mga celebrity performer sa Manila kay naa gyud silay production number kauban si Stephanie. Si Dulce (Maritess Llamedo sa tinuod nga kinabuhi) ug Anna Fegi adunay tagsa-tagsa ka duet ni Steph. Samtang si Alden Richards, Manolo Pedrosa ug Daniel Matsunaga adunay tag-tulo ka kanta.
Plus naa pay mga local artists sama sa PowerTrio, ML Madrigal Dancers, Kwin and Kim ug si Von Saw. Ang Centerstage Concert ni Stephanie mahitabo karong Agusto 28, 7 p.m. Dominggo sa Grand Ballroom sa Waterfront Cebu City Hotel.
FREE TICKETS
Sold out na ang P1,300 (VIP) tickets sa concert ni Stephanie. Ang available ang P800 (gold), P500 (silver) ug P300 (bronze) nga mapalit ninyo sa Ticket World, Ayala Center, Robinsons department, National Bookstore, Waterfront Hotel, M. Talent office ug sa Michel’s Wine Parkmall. Ang pinaka-exciting nga balita kay manghatag ko og libreng tickets sa concert. Yes, mga suki. Kada winner makadawat og duha ka tickets plus free CD album ni Stephanie featuring the hit song “Kulang Sa Lambing” nga duet nila ni Michael Pangilinan. Unsaon pagdaug? Mao nay dapat ninyong atngan dinhi sa atong Tagming, ming, ming…
BUS NA DAPAT
Usa sad ko sa biktima sa grabeng baha ug grabeng trapik niadtong Biyernes mao nga magpasalamat ko kadtong pamilya nga nagpa- hitch nako gikan sa Mabolo hangtod sa Liloan. Tayming kay padung silag Danao mao nga nakasakay intawon ko. Haay, paet!
Angayan na gyud nga mga bus na ang gamiton nga transportasyon tungod sa kadaghan nang tawo sa Cebu. Dili na matabang uy!
Kon ting- baha, ang mga multicab di kasugakod labi na sa Reclamation area ug Mandaue nga maora na’g dagat. Kon ting- traffic sad, dili pud sila mamasada kay alkansihon kuno sa biyahe mao nang pirmi gyud lisud ang sakay ug daghang pasaherong mangababoy.
Palihug, Mayor Tommy Osmeña, ikaw ra tingali makahatag og aksyon ani!