Dihang iyang gimahay ang Ginuo
SEPTIYEMBRE pa lang nagplano na si Rhedan Carwana nga maghimo og birthday party alang sa iyang ikatulong anak nga mag-usa ka tuig.
Nagplano na siya daan pila ka balloons ang paliton, unsa nga cake ug ice cream ang orderon ug ang mga sud-an nga andamon.
Gitiguman kini ni Rhedan aron mapalit ang mga butang nga kinahanglanon sa party alang sa iyang anak nga si Rhylle Zhack.
Apan siyam ka adlaw sa dili pa ang unang tuig sa kasumaran sa pagkatawo ni Zhack, namatay ang bata pagka Nobiyembre 12, 2007.
“Igo lang gyud ko nakaabot niya unya namatay siya. Nakasiyagit ko sa akong kalagot,” asoy ni Rhedan nga paingon mohilak dihang nahinabi sa Superbalita Cebu.
Ang bata unang na-admit sa Cebu City Medical Center pagka Septiyembre sa samang tuig dihang dunay niburot dapit sa iyang walang mata nga wa dayon makabuto.
Human makainom og tambal, nibuto ang hubag ug nakagawas na sa ospital si Zhack.
Apan pagka Nobiyembre 10 sa samang tuig, nabalik na usab sa CCMC ang bata tungod sa kalibanga nga nagkakomplikasyon sa pneumonia secondary to sepsis.
Tungod sa iyang kaguol, wala na niya buhii si Zhack ug nagsige na kini og kugos sa bata nga giputos og panapton hangtod nga siya nipauli sa ilang balay sa dan V. Rama, Barangay Calamba, siyudad sa Sugbo.
“Gidala pa nako sa balay, gipakatog nako og usa ka gabii kay basin mabuhi pa,” dugang asoy ni Rhedan.
Sa pagkamatay sa anak, gimahay niya ang Ginuo ug diriyot mawagtangi og pagsalig Niini.
Nasakitan siya tungod kay suod niya si Zhack nga moduol dayon niya inig mata niya sa buntag ug magpakugos usab inig abot niya sa balay pagka hapon gikan sa trabaho.
“Nganong naingon ani man? Unsa may akong nabuhat nga wa man unta ko magkuwang sa akong pamilya,” pahayag sa 36-anyos nga amahan.
Paglabay sa usa ka tuig, nakaamgo si Rhedan nga sayop ang iyang gibuhat pagmahay sa Ginuo.
Siya nangayo og pasaylo sa Labawng Makagagahum ug nangumpisal og pari. “Nakaamgo ko nga naay purpose nganong gibuhat to sa Ginuo, gisuwayan ko Niya. Dapat sa kinabuhi, dili mawagtangan og paglaom,” madasigon nga gipamulong ni Rhedan.
Nawad-an siya og usa ka anak apan nadungagan pa og duha ang ilang mga anak sa iyang asawa nga si Glenda, 34.
Karon, upat ang ilang mga anak --- 13-anyos (Grade 8), 11 (Grade 6), 8 (Grade 1), ug 6 (Kinder 2). Bag-o lang silang gikasal sa usa ka mass wedding.
Si Rhedan daghan na og nasudlan nga mga trabaho aron adunay ikabuhi sa iyang pamilya, kaabag si Glenda, usa ka landscaper sa Fort San Pedro.
Nakasuway siya nga namaligya ug nanuroy og banana cue, candy, junkfoods ug binotelya nga tubig ug nangonduktor og PUJ nga gimaneho sa iyang amahan nga si Pergie.
Nakatrabaho usab siya sa Mactan Export Processing Zone (MEPZ) sa sa Lapu-Lapu, nahimong promodizer ug karon usa na ka seafood merchandiser sa usa ka dakong mall ning dakbayan.“Salig ta sa Ginuo kay ang tanang problema naay solution. Maningkamot ta kay tabangan ta ni Lord,” panapos ni Rhedan.