Tsansing sa mga babaye

Dear Noy Kulas,

Tagoa lang ko sa ngan nga Venus, usa ka asawa ug naay tulo ka mga anak nga puro na mga ulitawo. Ang akong problema mao ang akong bana nga hilig magsige og pang chat. Bisan akong mga amiga pangayoan og cellphone number unya iya sab nga hatagan sa iyaha.

Unsa ang akong angay buhaton niya nga lately nasakpan nako sa iyang mga chat sa mga babaye? Nagkita sila sa usa ka babaye nga minyo. Kon akong ipaagi og komedya, masuko siya nako ug ipahid niya nako ang iyang bisyo.

Angay ba nga istoryahon nako ang mga babaye kay naa koy mga number nila? Di na ko ka focus sa akong trabaho kay magsige ko og huna-huna unsaon nako nga masumpo ni iyang kabuang. Naa pa kaha ni siyay love nako? Naka decide ko nga ako na lang siyang byaan ilabi na nga wa na siyay trabaho, akoa ang tanan. Pero okay unta kon wa siyay work basta motabang lang siya og paminsar unsay among mahimo alang sa among pagpuyo. Kalas pa og kay bisag pang internet ari pa nako mangayo. Please tambagi ko, Noy, unsay angay nakong buhaton kay nagplano ko nga ako siyang buwagan.

Salamat! VENUS

Ven,

Isip asawa, naa kay katungod nga mobadlong kaniya bisan masuko pa siya nimo. Mahimo usab nga imong estoryahon ang mga babaye nga nakig-chat niya. Ayaw lang padala sa emosyon aron di mogara kay naa ra bay ubang mga tawo nga kon awayon, mosamot na hinuon.

Ayaw lang una buwagi kon kana rang problema pa ang nahitabo. Sa ako nang giingon nga estoryahi siya nga mohunong na nianang iyang bisyo. Kon duna kay ebedensya nga mapakita ngadto niya sa iyang gibuhat, pakit-a siya. Kon nakasakop ka kaniya nga duna siyay ka chat, kuhag kopya sa ilang conversation ug ipakita kaniya aron din a siya makapanghimakak.

Hunongi na ang paghatag niya og pang internet aron di na siya matintal. Sultihi siya sa pagpangitag trabaho inay magsige og internet. Kon moingon siya nga mangita siya pinaagi sa internet, ayaw na siya hatagi og sige kay lahi ang iyang katuyoan sa pag- surf.

Estoryahe usab ang iyang pamilya kabahin sa iyang kabuang aron matabangan ka sa pagbadlong niya. NOY KULAS