My heart will be waiting for you

(Ikalima sa pito ka mga gula)

KANUNAY kong masakpan si Edmund nga mopasiplat nako. Unya iya kong pahiyoman. Mopahiyom sab ko niya. Naghilom lang siya. Pero may mga higayon nga motutok si Edmund kang Vicky. Ug si Vicky sab, motan-aw og dugay kang Edmund. Unya magpahiyomay sila.

Samtang si Royette, nagduko lang nga nagsigeg kaon. Mao pay pagpaniudto namo dihang miabot si Edmund. Gani, wa pa man siya makakaligo sa dagat. Nuon, nag- short pants na siya daan ug nagtisirt. Pagkahuman namog paniudto, nangaligo pagusab sila si Vicky ug Royette. Kami na lang duha si Edmund ang nahabilin sa giabangan namong cottage. “Mangaligo sab ta, Ruby.” Wa koy tingog nga mitando. Miubog dayon mi si Edmund sa dagat. Pero sa mabaw nga bahin ra ko, kutob sa akong dughan ang giladmon sa tubig dagat nga akong nahimutangan. “Adto ta didto, o, Ruby.” Gitan-aw ko ang gitudlo ni Edmund, ang nahimutangan nila ni Royette ug Vicky ang iyang gitudlo. Sus, lawom kaayo ang maong lugar. “Di ko, uy! Lawom didto. Di ko makamaong molangoy.” Mauwawon ko nga mitug-an kang Edmund. Pero igo lang mipahiyom si Edmund.

“No problem. Akoy mahibawo nimo. Maayo kong molangoy kay anad ko sa amo didto sa Dalaguete. Daplin sa dagat ang among balay. Bata pa ko nagsige na kog kaligo sa dagat. Mao bitaw nga naitom ning akong panit.”

Di man itom si Edmund sa akong tan-aw niya. Tabunon nuon siya. Pinoy kaayo ang iyang pamayhon. Guwapo sab siya. “Di ko, uy. Anhi lang ta dinhi.” Milantaw ko kanila ni Royette ug Vicky. Malipayon kaayo silang nagginukdanay sa paglangoy. Unya namatikdan ko si Edmund nga mikalit sa pagseryuso nga milantaw sab kanila ni Vicky ug Edmund.

“Taga Dalaguete diay ka, Ed? Sa ato pa, nagsaka kag boarding house sa siyudad?”

“Yes. Every end of he month ko mopauli sa amo sa probinsya. Kapoy ug ka’as sa plite kon every weekend ko mopauli. Miyangu-yango ko. unya naglanguy-langoy ko sa mabaw nga bahin sa dagat. Miuban na lang sab si Edmund sa paglanguy-langoy nako. Dihang gikapoyan na ko, nananghid ko kang Edmund.

“Moadto sa ko sa cottage, ha, Ed. Mopahuway ko. Kapoy na man.” “Aw, ubanan tika. Gilaayan na sab ko sa pagkaligo.” Igo lang kong mitando. Unya nagdungan mig haw-as si Edmund sa dagat. “I love her very much, Ruby.” Nakahunong ko paglakaw. Nakahibawo ko nga si Vicky ang gipasabot ni Edmund.