PBA players molangkob sa Landmasters: Tan
GAMAY na lang ang kinahanglang ihan-ay ug maandan na ang Cebu Landmasters alang sa kampanya niini sa bag-ong regional basketball league nga gisunod sa nabungkag nga Metropolitan Basketball Association (MBA) – ang Countrywide Basketball League (CWBL).
Mao kini ang gipabuhagay ni Landmasters coach Jun Tan sa pagpakighinabi ning mantalaan kagahapon.
Nagkanayon si Tan, kanhi coach sa Cebu Gems sa MBA, nga posible sa sunod semana, makompleto na ang line-up sa Landmasters nga mokombati sa CWBL nga gikatakdang sugdan karong Agusto 7 ubos sa pag-abag sa television giant ABS-CBN.
Gipasabot ni Tan nga ning puntoha nga kada adlaw na silang nagpraktis sa mga potensyal nga makuha sa team.
“Wala pa mi final nga line-up pero nagdawatan na ni sila og allowance sa among praktis,” matod ni Tan.
Sa kinatibuk-an, 18 ka mga magduduwa ang naa sa listahan ni Tan apan walo niini nga gikan sa Manila wala pa nakaapil sa ilang ensayo.
Matod ni Tan nga sa walo nga gikan sa Manila, tulo niini ang aktibo pang nagduwa sa Philippine Basketball Association (PBA) unya aduna sa’y duha ka Fil-Ams.
“Gusto man gud aning PBA players nga i- buyout ang ilang kontrata sa ilang tagsatagsa ka team sa PBA. Dili pa ta puwedeng mosulti kon kinsa ni sila kay wala pa namo nafinalize ang tanan,” dugang ni Tan.
Sa mga nag-apilan na sa ilang praktis, nagkanayon si Tan nga ang adunay dakong poruhan nga masulod sa final line-up mao sila si Reed Juntilla, Hafer Mondragon, Chris Dumapig, ug Mark Ababon.
Gawas sa Landmasters, ang laing teams nga apil sa labing unang edisyon sa CWBL mao ang M. Lhuillier-Cebu, Manny Pacquiao-GenSan, Flying V-Davao, Anak ng Laguna ug Mighty Sports-Bulacan.
Matod ni Tan nga mosalmot sab isip guest teams sa unang season sa torneyo ang hugot nga managribal nga teams sa UAAP nga mao ang Ateneo Blue Eagles ug La Salle Green Archers.
Ang legendary coach nga si Joe Lipa maoy modumala sa torneyo unya si Atty. Pablo De Borja maoy founding commissioner.
Ang torneyo mosubay sa FIBA amateur rules alang sa doubleround robin eliminations nga maoy modeterminar sa upat ka teams nga mosaka sa playoffs.
Ang mga duwa sa torneyo, nga mosubay sa home-and-away format, ipahigayon matag Huwebes ug Biyernes unya isalida ang mga duwa niini sa ABS-CBN Sports and Action. Matag semana, lainlain ang mo-host sa duha ka mga adlaw nga mga engkuwentro.
Ang torneyo adunay tulo ka mga komperensiya matag season.