Cebu Province mopahigayon og fun run, futsal tourney sa Agusto

ISIP lakip sa mga kalilhukan alang sa kasaulogan sa 447th Cebu Province Founding Anniversary, ang Cebu Provincial Sports Commission mopahigayon og duha ka sports competition.

Sa Agusto 28, ang Cebu Province mohimog Anniversary fun run nga manukad diha sa Cebu Provincial Capitol diin ang tumong ug katuyoan niini kabahin ra usab sa pag-ugmad sa grassroots sports program sa CPSC.

Gibahin ang fun run ngadto sa unom ka kategoriya. Kini mao ang 20 kilometer, foreign 20K, 10K local, 5K grassroots, 3K grassroots ug 5K employees. Hinuon way bayad ang sa grassroots ug capitol employees categories.

Mga ganting salapi ang nakahan-ay alang sa mga mananaog sa matag kategoriya.

Ang mopatugbabaw sa local ug foreign 20K adunay tag P10,000 nga mabulsa samtang sa 10K local ug capitol employees mouli usab nga adunay tag P5,000.

Ang 5K grassroots level makaangkon og P3,000 ug ang modaog sa 3K winners makaganti usab og P2,000. Aduna usay cash prizes ug medals ngadto sa masulod sa Top 10 sa tanang kategoriya.

“We intend to do this event every year. The plan of Gov. Hilario Davide III is to continue and expand the grassroots program,” matod ni Atty. Ramil Abing, ang executive director sa CPSC.

Gawas niini, ang CPSC mopahigayon usab sa ilang 1st Anniversary Futsal Tournament sa Aug. 13 ngadto sa 14 diha sa Minglanilla Sports Center.

Kining maong tournament inabagan sa Cebu Football Association (CFA).

Kini gibahin ngadto sa tulo ka divisions nga mao ang Girls 15-under, Boys 15-under ug mixed under-11.

Si Eleazar Toledo, usa sa nagpasiugda, mibutyag nga mokabat ngadto sa 20 ka mga teams gikan sa probinsiya sa Sugbo, Mandaue City, Talisay City, Barili, Balambanh, Argao, Dumanjug, Lilo-an, Consolacio, Danao City ug Carmen ang lakip unya sa pang imbitahon.

Si Brando Velasquez, ang Administrative Officer III sa CPSC, nagkanayon nga gawas niining duha ka nga nahisgutan sa unahan, ang ubang grassroots program nga ilang tutukan usab mao ang athletics, badminton, basketball, chess, karatedo, tennis, volleyball, softball, baseball ug football.

Samtang ang registration fee sa Anniversary run mokantidad og P500 sa 20 K samtang P300 alang sa 10 K.

Ang registration forms makuha sa Cebu Provincial Office, 2nd Floor of tte Legislative Bldg., Capitol Compound, Cebu City ug Cebu City Sports Center.