Pagara atakihon og maayo ni Juarez

NAKATAKDANG moabot karong adlawa sa San Francisco si Mexican Cesar Juarez alang sa iyang pagpakig-away kang Filipino “Prince” Albert Pagara sa main event sa Pinoy Pride 37: Fists of the Future nga gikatakda karong Hulyo 9 sa San Mateo Event Center sa San Francisco, California, USA.

Suwayan pag-ilog ni Juarez ang World Boxing Organization (WBO) International super bantamweight title ni Pagara.

Kon rekord ang hisgutan, nakabintaha si Pagara apan alang kang Juarez nga dili kini mao ang tinuod nga senaryo. Si Pagara naggunit og 26-0, 18KOs nga rekord samtang si Juarez adunay 17-5, 13KOs.

Sa nangaging mga interbyu, nipasiatab si Juarez nga wala pa nakakontra si Pagara og sama kaniya’g abilidad hinungdan nga dako ang iyang pagsalig nga mopatigbabaw ning awaya.

“My style is attacking and attacking, overwhelm my rivals by throwing a lot of punches,” matod pa ni Juarez.

Kini nga estilo maoy nakahatag og lisod kang WBO super bantamweight champion Nonito “Filipino Flash” Donaire dihang nakig-away kini kang Juarez.

Napilde man tuod si Juarez pinaagi sa desisyon apan nakasugat sab og grabeng binukbokay si Donaire.

Ang away nila ni Juarez ug Donaire nahilakip sa lig-ong kandidtao alang sa 2015 Fight of the Year.

Matod ni Juarez nga ang iyang pagkapilde kang Donaire nakahatag niya’g dugang kadasig aron mamungot ngadto kang Pagara.