KOMBATI NA!

Mga duwa karon

6:30 pm- Turkey batok Canada (Group A) 9:00 pm- RP Gilas batok France (Group B)

SUGDAN sa RP Gilas Pilipinas ang grabe nila ka lisod nga tahas karong gabii sa pagsugod sa FIBA Olympic Qualifying Tournament (OQT) Manila leg sa Mall of Asia Arena sa Pasay City.

Sa premiro nilang tahas, daw mobangga og sementadong bungbong ang Gilas kay ikaharong nila ang gikonsiderar nga sayong paborito sa torneyo nga mao ang France sa main game sa alas 9:00 sa gabii.

Ang France pangulohan ni Tony Parker, pambatong pointguard sa San Antonio Spurs sa National Basketball Association (NBA).

Gawas kang Parker, ang ubang mga magduduwa sa NBA nga naa sa France mao sila si Boris Diaw sa Spurs, Evan Fournier sa Orlando Magic, Rudy Gobert sa Utah Jazz ug Nicolas Batum sa Charlotte Hornets.

Dili ikalimod nga grabe ka inilog ang France ning sangkaa apan alang kang Parker, dili makompiyansaan ang puwersa sa Gilas.

Sa interbyu sa www.rappler.com, nagkanayon si Parker nga ilang gikabalak-an ang three-point shooting sa Gilas.

“We know it is a big part of their arsenal and they are very good at it,” matod pa ni Parker. “If the Filipinos get hot from the outside it will open up the lane for Andray Blatche and those quick point guards of theirs. So we have to guard against that.” Gitumbok ni Parker mao sila si Jayson Castro ug Terrence Romeo. Gipasabot ni Parker nga kon mangigo sa gawas ang Gilas, hayan makaarte og sakto ang mga pambato niini sa ilawom nga sila si naturalized Andray Blatche, JuneMar Fajardo, Ranidel de Ocampo, Mark Pingris ug Japeth Aguilar.

Ang ubang mga magduduwa sa Gilas mao sila si Bobby Parks, Jeff Chan, Gabe Norwood, Ryan Reyes, ug Troy Rosario.

Sa premirong duwa, magsangka ang Turkey ug Canada sugod sa alas 6:30 sa gabii.

Ang Gilas ug France nahisakop sa Group B kauban ang New Zealand samtang ang Turkey ug Canada naa sa Group A kauban ang Senagal.

Ang matag grupo mosubay sa single-round robin alang elimination round unya ang mopatigbabaw nga duha human niini mao ang makaabante sa crossover knockout semi-finals.

Ang mokampiyon ning maong kompetisyon makaangkon og luna alang sa Rio Olympics karong Agusto.

Sulod na sab sa 44 ka mga tuig nga wala nakapadala og basketball team ang Pilipinas alang sa matag upat ka mga tuig nga kompetisyon.

(HULAGWAG GIKAN SA INTERAKSIYON.COM) LISOD NGA TAHAS. Malisod man tuod nga tahas ang atubangan sa Olympic Qualifying Tournament nga sugdan karong adlawa didto sa Mall of Asia Arena, apan masaligon ug andam ang RP-Gilas nga mosagubang niini. Ang kompletong milangkob sa team (gikan sa wala)...