TUBIG GIKAGUBTAN
Mitubod sa sawog kapilya, gisawod kay ‘tambal, nakaayo’
GIDUMOG sa mga tawo ang kapilya ni Senior San Roque sa Sityo Laguna, Barangay Basak Pardo, Siyudad sa Sugbo kay sila nagtuo nga milagruso ang tin-aw nga tubig nga niagas sa giputol nga PVC pipe.
Ang tubo nagtapot sa bungbong sa kapilya.
Samtang ang Metro Cebu Water District (MCWD) misusi sa tubig, niingon nga kini dunay chlorine, apan di pa sila seguro kon sa ilaha ba kini gikan.
Ang mga tawo nagtuo nga nagmilagro si San Roque nga maoy patron sa mga tawo nga nataptan og makamatay nga sakit human naayo ang ilang gihambin nga balatian dihang ilang giinom ang tubig ug gihaplas sa ilang lawas.
Ang mga tawo nagdala og mga gallon ug plastic bottles aron pundohan.
Sa ilang tan-aw, ang tubig gikan sa ilawom sa flooring sa kapilya kansang tubod aduna lay giladmon nga duha ka pulgada.
Si Jeffrey Restauro, kinsa namaligya og pagkaon tupad sa kapilya, niingon nga niadto pang Hunyo siya nakabantay nga adunay gamay nga tubig nga niagas apan ila rang gibaliwala.
Sugod niadtong Hulyo 22 diin nagsugod ang novena alang sa kapistahan ni San Roque karong Hulyo 31, ilang nadiskobrehan nga nikusog ang agas sa tubig.
Si Restauro nibutyag nga niadtong Hulyo 24, ang presidente sa kapilya nga si Junie Reyes adunay hubag sa iyang kamot.
Iya kining gihaplasan sa tubig ug paglabay sa pipila ka mga adlaw, nawala.
Si Basak Pardo Barangay Kapitan Yolandito Cagang nagkanayon nga aduna say mga tawo nga nihaplas sa tubig sa parte sa ilang lawas ug nangaayo ang ilang balatian.
Iyang gikuhaan og base ang kaso sa usa sa iyang mga residente nga giingong di matul-id ang siko.
Dihang gihaplasan sa tubig, iya nang naobserbahan nga makapiko na kini.
Si Marlyn San Luis, nga nahinabi sa Superbalita Cebu, kinsa nihaplas og tubig, nihulagway nga nawala ang sakit sa iyang lawas dihang iyang giinom ug gihaplas ang tubig dihang naglain ang iyang lawas.
Ang iyang apo nga gisakitan sa ngipon gipainom, nahinanok sa pagkatulog kay nawala.
“Siguro ana, milagro gyud kay motuo man sad ko,” paghulagway ni San Luis.
Si Jenefer Carolasan, kinsa maoy naggiya sa mga gustong maghakot og tubig, nisulti sa Superbalita Cebu, nga lahi ang lasa sa tubod human siya makainom.
Ang mga bata ang ilang gisugo sa pagkawos gamit ang gamay nga basong plastic sanglit kamot ra sa mga bata ang maarang tungod sa kagamay sa lunggag.
Usa sa mga ningkuha og tubig mao si Enes Morales, taga Basak Pardo, aron iyang ihaplas sanglit daghan na sa mga tawo ang nitestigo nga makaayo sa balatian.
GISUSI
Matod ni Cagang nga ilang gipawong ang tanang metrohan sa tubig sanglit adunay stub-out sa MCWD duol sa kapilya sa pagtuo nga aduna kini leakage, apan negatibo.
Gipadayag ni Restauro nga niadtong Hulyo 22, mapawong ang tubig alas 10:30 sa buntag ug mobalik paglabay sa 15 minutos.
Dihang nagkadaghan na ang mga tawo nga gustong makapundo sa tubig para ihaplas ug imnon, wala nay hunong ang agas nga daw sama kakusog sa agay sa gripo.
Adunay say mga tawo gikan sa Lilo-an, Mandaue City, Barangay Inayawan, Buhisan ug Bulacao ang nagkuha og tubig gikan sa kapilya para ihaplas ug imnon.
BALAANG IMAHEN
Atol sa paghugop sa mga tawo sa niaging gabii, si Junalyn Ramirez nikuha og hulagway sa mga tawo.
Nanlimbawot ang iyang balahibo uban sa mga tawo nga nakakita sa picture nga giingong adunay naporma nga nawong ni Birhen Maria.
Sa laing hulagway, ang semento diin gibutang ang PVC pipe ug diin nidagayday ang tubig, aduna say nawong nga naporma ug ilang gihulagway nga iya kini ni San Roque base sa ilong, bungot ug buhok samtang ang iyang atbang mao ang sunog nga hulagway ni Senior Santo Niño.
Matod pa niya nga magpista sila bisan sa kanihit sa ilang budget karong Hulyo 31 isip halad sa ilang patron.
WATER SAMPLE
Nasuta sa MCWD, matod ni Charmaine Rodriguez-Kara, tigpamaba sa kompaniya, nga ang tubig nga nag-agas adunay presensiya sa chlorine human nila susiha.
Buot ipasabot nga di kini tubod gikan sa yuta.
Apan di sila makatino kon gikan ba sa ilang mga linya ang maong tubig sanglit aduna say presensiya sa ubang private water supplier.
Matod ni Kara nga bugtong makahibawo sa tinuod nga kahimtang mao ang ilang ekipo nga makadetect kon adunay leakage ang ilang mga tubo.
Ilang suwayan karong kadlawon o sa mosunod nga kadlawon nga maatol nga mingaw ang lugar sanglit di maka-detect ang ilang ekipo kon saba ug adunay kasikas ang lugar.