Ang pag-host sa Pilipinas sa Miss Universe
KARONG kumpirmado na nga sa Pilipinas ipahigayon ang Miss Universe 2017 karong Enero 30, si Tourism Secretary Wanda Teo nisaad nga walay bisan usa ka sentimo nga magasto ang Pilipinas niini ug nga dili ni makamugna og dugang labad sa ulo sa traffic gumikan sa maong international event. Si Secretary Teo nidugang nga aduna nay mga sponsor nga moabaga sa $11 million (more than P518 million) budget nga maoy kinahanglanon aron magmalampuson ang Miss Universe pageant. Apan wala siya mobutyag kon kinsa ang maong mga sponsor. "There's only one group talking in behalf of all of them. They requested not to mention their names first. They will have a different press conference for that." Ang Pilipinas duha na ka higayon nga naka- host sa Miss Universe. Una, niadtong 1974 nga nadaug ni Miss Spain Amparo Munoz ug ang ikaduha niadtong 1994 nga nadaug ni Sushmita Sen sa India. Ang Spain ug India parehong duna ray tagsa ka daug sa Miss Universe, samtang ang Pilipinas nakatulo na.
Ang plano ni Teo nga sa Mall of Asia Arena ipahigayon ang Miss Universe 2017 tungod sa iyang 20,000 seating capacity.
Usa kuno ka buwan modagan ang pageant, diin ang ubang kalihukan ipahigayon usab sa Davao, Cagayan de Oro, Cebu, Palawan, Boracay ug Vigan.
"The President told us that the auxiliary events should be done in the provinces so as to avoid the traffic here in Manila," pasabot ni Teo.
Ang Miss Philippines-Universe 2016 Maxine Medina nipadayag sa iyang kahinam nga dinhi sa Pilipinas himuon ang pageant. Matod sa 25-anyos nga interior designer nga iyang himuon ang tanan aron ipasigarbo siya sa mga Filipino.
"Trust me mga kababayans, I am doing everything to make you and the whole country proud in the upcoming pageant. Thank you for the support and love," post ni Medina sa iyang Instagram.