Personnel sa EMS subling bansayon
BANSAYON pag-usab ang 154 ka mga personnel nga nangadestino sa mga emergency medical service vehicle sa dakbayan sa Sugbo aron mas molapad pa ang ilang kahibawo.
Matod ni Nagiel Bañacia, public information officer ug pangulo sa Local Disaster Risk Reduction ang Management Office (LDRRMO), nga kini gikinahanglan sanglit ang paramedics sa EMS, basic life support ug first aide lang ang nahibaw-an.
Nipasabot si Bañacia nga way kapabilidad ang maong mga personnel sa pag-responde og trauma cases kon subayon ang proseso nga gikinahanglan sa mga tawo nga gitahasan niini hinungdan nga iyang pangayuon ang serbisyo sa mga training personnel sa Emergency Rescue Unit Foundation.
Gihulagway niya nga ambulatory kun mga pasyente nga makalakaw pa ang kapabilidad nga matagad sa mga personnel sa EMS hinungdan nga nagkinahanglan sila og dugang training.
Ang Cebu City Government mopatuman usab og kausaban sama sa pagpalambo sa pinili nga mga health centers nga maoy unang hatdan sa mga pasyente nga adunay gihambin nga ginagmay nga balatian aron di maghuot sa Cebu City Medical Center.
Gihimong pilot area ni Bañacia ang Mabolo Health Center diin ilang butangan og doctor ug mga nurse, midwife ug gihatagan og ambulansiya ug moresponde usab og mga alarma.
Gibutyag niya nga gawas sa Mabolo, mobutang sila sa ubang strategic nga barangay diin dako og sanggab aron dali ra nga ma- access sa pasyente.