I live for your love
IGO
lang kong mipahiyom sa gisulti ni Ador. Expected na man ni nako.
“Karon pa lang, Loreen, modesisyon ka na. Basig di ka kaagwanta. Sakitan man gyod ka.”
Mihunong paghungit si Ador sa ice cream. Nagpabugnaw mi niadtong tungora sa SM. Gikan ming nanan-aw og sine.
“Nganong gipangulitawhan man ko nimo, Dor?” Naninguha ko nga magmalipayon sa atubangan sa akong boyfriend. Almost five months na mi. “Usa ra may tubag ana, Loreen. Because I love you.” “Aw, naa ra man diay na? So, pasagdi kong magpabiling magmahal nimo. Let’s say, forever.”
Gitrapohan ko sa akong palad ang mipilit nga ice cream sa ngabil ni Ador. Nakapahiyom si Ador. “Forever? Naa pa diay ni ron, Loreen?” “Yes. Naa pa, nia sa akong kaugalingon. Sa tibuok kong kasingkasing ug pagka tawo.”
Dugay na kong hilom nga nahigugma kang Ador. Kanunay siyang mo- top sa pagka honor student sukad pa sa among pagfirst year sa kursong Accountacy hangtod karon nga graduating na mi. Klasmet mi kanunay. Gawas nga nailhan si Ador sa campus sa university nga among gitunghaan nga bright, nailhan sab siya sa iyang pagka hilig og babaye. Mag-ilis-ilis lang siyag girlfriend.
Dihang gipangulitawhan ko niya, wa ko na siya paantosa. Gisugot dayon nako siya. Miuban ko niya sa pagpanan-aw og sine nga dunay dakong pagsalig niya. Gipasagdan ko siya sa iyang gibuhat nako sa sulod sa sinehan. Wa ko mosupak kay di ko gusto nga mahiubos siya nako.
Pero duna koy gihatag nga limitasyon niya. Misabot sab siya. Nagkasabot mi nga kinahanglang di mi magpadala sa among emosyon, sa kainit sa among gugma sa usag usa.
“Pero masakitan ka lang lagi, Loreen. To be honest, duna na sab koy new girlfriend ron. Si Sofia, your best friend.”
Nakalitan ko. Pero kadyot ra. Dugay na kong nasayod nga may hilom nga pagmahal si Sofia kang Ador.
“Wow! Milampos gyod diay siya?” Mipakibo ko sa akong mga abaga. Wa ko mobatig kahiubos kang Sofia. Wa gani ko masakiti. “Unsay milampos siya?” Klaro nga nahibulong si Ador. Nakunot ang iyang agtang. Mikatawa kog hinay.
“Dugay nang nakagusto si Sofia nimo, uy, Ador. Wa siya motago ani nako. Giingnan pa gani ko niya nga himuon niya ang tanan aron mauyab ka niya.” Miyangu-yango si Ador. Nakapanglingo siya. “Di kaha ko makarma aning akong pagduwa-duwa ninyong mga girls, Loreen?”
Motuo diay og gaba ang akong boyfriend? (SUMPAYAN)