Schedule sa Senado dili maapektohan: Pacman

GIPASALIG og balik ni Filipino boxing icon Manny Pacquiao nga dili maapektuhan ang iyang obligasyon isip senador sa Pilipinas sa higayon nga mobalik na siya og away.

Nagkanayon si Pacquiao nga wala’y mga adlaw sa session sa senado ang maapektuhan sa eskedyul sa iyang away.

Nagkanayon ang Pambansang Kamao sa Pilipinas nga tinguha niyang dili makapalyar bisan usa lang ka session human siya nakadawat og daghang mga pagsaway kabahin sa iyang mga absent dihang usa pa siya ka kongresista.

“Sinisikap natin ‘yan dahil unang-una, wala namang magbabawal sa akin mag -absent ako pero ang goal ko talaga magampanan ‘yung trabaho ko,” matod ni Pacquiao sa interbyu sa Spin.ph.

Si Pacquiao, kinsa maoy pangulo sa committee on public works and committee on games, amusement, and sports, nagkanayon nga mapasalamaton siya sa iyang mga kritiko sa paghagit kaniya nga magpakita og maayong sa trabaho sa senado.

“Nakaya ko ngang maging champion sa boxing dahil sa disiplina ko, ‘yan pa kaya na hindi ako mabugbog?” pasabot sa 8-time world champion.

Matod ni Pacquiao nga wala pa sila nagsabot ni Top Rank boss Bob Arum kabahin sa iyang pagbalik og away apan iyang gitino nga kon ma-finalize na kini, gusto niya nga anhi sa Pilipinas ipahigayon ang tibuok niyang training.

“May gym malapit sa Senate. Madali lang, mag-training lang pagkatapos ng session or before,” batbat ni Pacquiao.

Gipasabot ni Pacquiao nga nakadesisyon siyang moaway og balik aron makakuha og pundo alang sa iyang pamilya ug uban pa niyang panginahanglanon.

“Ayaw kong gamitin na maging livelihood ‘yung pagseserbisyo ko sa government,” matod ni Pacquiao. “Because what I believe is government is a public service, not a personal business.”