Ex-con nga wa mosanong sa tokhang gipatay
EX-CONVICT nga gikan nagbilar og patay gipusil patay sa may Barangay Canjulao, dakbayan sa Lapu-Lapu niadtong Dominggo sa gabii.
Ang biktima gitokhang sa kapulisan, apan giingong wa mosanong.
Namatay diha-diha tungod sa samad pinusilan sa ulo si Mamerto Cabalhug, 48, way trabaho, taga-Purok Lubi, Barangay Canjulao, Lapu-Lapu City, human gipusil tumong sa ulo sa wa pa mailhing mamumuno.
Base sa pasiunang imbestigasyon sa Lapu-Lapu City Police Office Homicide Section nga si Cabalhug gikan sa haya sa iyang silingan ug sa iyang pagpauli sa alas 11:45 niadtong Domingo sa gabii, gisundan siya sa usa ka lalake dayon gipusil.
Si Cabalhug kinsa nag-atubang kaniadto og kasong murder resulta sa iyang pagkabilanggo ug gikatahong gi-tokhang sa kapulisan apan wa mosurender.
Yano rang mibiya ang gunman dala ang wa matinong armas.
Ang kapulisan nakahipos og kutsilyo nga giluklok pa kilid sa lawas ni Cabalhug.
Lawas ni Cabalhug gidala sa Surelife Funeral Homes.
NASAKPAN
Nasikop sa kapulisan sa Talisay City ang tulo ka mga lalake nga nagsuyop og shabu atol sa gipahigayon nga Oplan Tokhang sa sitio Tunga, Barangay Tanke niadtong Dominggo sa hapon.
Ang suspek giilang mao sila si Nole Nuñez, 32, ulitawo; Doroteo Radores, 22, ulitawo, taga Calajoan, lungsod sa Minglanilla.
Samtang ang tag-iya sa suyopanan mao si Leonarda Cabanes, 65, nagpuyo sa nahisgutang lugar.
Si Supt. Aileen Recla ug iyang mga sakop mao ang nihimo sa ilang kalihukan sa lugar sa dihang usa ka tawo nipahibawo kanila nga adunay nagsuyop og shabu sa usa ka balay.
Daling niadto ang mga pulis ug didto ilang nakit-an sa akto ang mga suspek.