Kahigayunan gihatag sa Liloan sa mga durugista
DUNA pay second chance. Ang kagamhanan sa lungsod sa Liloan pinanguluhan nila ni Mayor Christina Frasco ug Vice Mayor Duke Frasco milusad kagahapon sa Liloan Operation Second Chance alang sa 1,260 ka drug personalities nga nitahan sa ilang kaugalingon ngadto sa awtoridad.
Si Mayor Christina namulong nga ang local government unit dunay dakong responsibilidad sa mga drug surrenderee nga gusto mobarog ug mag-bag-o sa kaugalingon human mibiya sa dautang bisyo.
“Kay kamo niisa sa inyong kamot kay gusto mo magbag-o...Andam kami mokab-ot sa inyong kamot aron kamong tanan mahatagan og second chance,” sumala sa mayor atol sa paglusad sa kalihukan nga gitambungan sa di mominos 200 ka drug surrenderees.
Matod niya pinaagi sa programa dunay higayon ang mga drug surrenderees nga gitawag usab nila nga volunteers nga makaapil sa livelihood ug skills training, sports clinics, health services ug community-based rehabilitation.
Tudloan sila sa carpentry, massage, bakery, ug cooking pinaagi sa Alternative Learning System ug Technical Education and Skills Development Authority (Tesda) ingon man sports clinic sama sa basketball, volleyball, chess ug table tennis.
Si Duke niingon nga aduna sila’y P500,000 nga pasiuna nga gahin alang sa programa.
Si Ian, 20, kanhi nagumon sa shabu, nipaambit nga nakaangkon siya og kahayag sa iyang kinabuhi human siya nihukom nga motalikod na sa dautang bisyo.
Sud sa 4 ka tuig, naadik siya sa ginadili nga drugas diin nagsugod siya og gamit sa dihang nagpanuigon pa lang siya og 15. Siya niangkon nga usa ka drug lord ang iyang amahan nga gipusil patay sa ilang barangay sa Liloan ug wala pa madakpi ang mamumuno, samtang, tigbaligya og shabu ang iyang duha ka mga igsuong lalake.