Pagtumaw sa Kilusang Pagbabago
SAMTANG naghurar ang kapin sa gatus ka mga lokal nga mga politiko dinhi sa lalawigan nga magpasakop sa PDP-Laban, naghurar sab ang pipila ka gatos ngas mga ordinaryong mga tawo nga nagpasakop sa Kilusang Pagbabago sa lain-laing dapit sa Kabisayan lakip na ang lalawigan ug Syudad sa Sugbo.
Aw duna diay tuod politiko nga nagpasakop sa Kilusang Pagbabago didto sa Syudad sa Ormoc ug mao kini ang ilang mayor nga si Mayor Richard Gomez.
Dinhi sa Sugbo, naghurar sa mga nangapil karon sa PDPLaban nanumpa atubangan kang Speaker Pantaleon Alvarez. Sa Ormoc, nanumpa ang nangapil sa Kilusang Pagbabago kang Sec. Jun Evasco.
Sa akong nahibaw-an, ang PDP-Laban ug ang Kilusang Pagbabago mao ang duha ka politikanhong grupo karon nga nagsupora kang Presidente Rody Duterte.
PDP-LABAN
Ang PDP-Laban mao ang partido nilang Alvarez ug Sen. Koko Pimenel. Gipangulohan kini karon ni Presidente Duterte. Apan ang maong partido nagsugod kaniadtong naa pa kita ilawom sa diktadurya ni Marcos.
Mao kini ang partido nilang Nene Pimentel, Tony Cuenco ug anhing Inday Nita CortesDaluz nga nakigbisog batok sa diktadurya ug nagsuporta kang Cory Aquino. Gitukod ug kusog ang PDP-Laban dinhi sa Visayas ug Mindanao. Didto sa kaulohan, nagkahiusa sab batok kang Marcos ang Liberal Party ug ang Nacionalista Party.
Samtang nidaog si Marcos isip presidente nga usa ka Nacionalista, gibiyaan niya kini dihang iyang gitukod ang iyang Bagong Lipunan ug gitukod ang Kilusang Bagong Lipunan kun KBL nga partido sa administrasyon panahon sa diktadorya.
Niadtong tungura, ang PDP-Laban mao ang politikanhong partido sa mga oposisyon nga politiko dinhi sa Sugbo ug sa Mindanao samtang ang mga aktibista sama kanako naa sa lain-laing mga kalihokan sama sa Nagkahiusang Sugbo Alang sa Demokrasya nga gipangulohan nilang Fr. Rudy Romano ug Mrs. Zeny Uy.
Sulod sa pipila ka mga administrasyon human nidaog sa EDSA 1 ang mga anti-Marcos, daw nawani ang PDP-Laban. Sa miaging administrasyon, ang nakapabor mao ang Liberal Party. Karong administrasyon na ni Presidente Duterte, ang partido sa mga politiko nga nagsuporta kaniya mao ang PDP-Laban. Gikan sa pipila na lang ka sakop panahon sa kampanya, nahimo kining labing dako nga partido bisan wala pa mohurar si Digong.
DCT
Apan dili lang mga politiko ang nagsuporta kang Digong panahon sa kampanya. Naay lapad kayo nga mass movement sa tibuok nasud ug ang nagdala sa koordinasyon sama sa kabukogan sa lawas mao kining gitawag og DCT kun Duterte Campaign Team.
Ubos kini sa liderato ni Jun Evasco nga maoy national campaign manager sa kampanya ni Duterte. Atong nasayran niadtong tungora nga kining DCT maoy aktibo sa mga alyansa ug kalihokan diha sa grassroots hangtod nga nakab-ot ang politikanhong momentum sa kampanya dungan sa ikaduhang debate nga gipahigayon diha sa UP-Cebu. Mao kini ang giingong turning point sa kampanya sa tibuok nasud dinhing tungora nga niduyog na ang mga politiko sa kampanya.
Sa akong nabal-an, sila si Rex Fernandez sa DCT uban sa PDP-Laban nga gipangulohan ni Noel Felongco dinhi sa Sugbo mao ang nakig- coordinate sa One Cebu human nideklarar kini nga mosuporta kang Duterte.
Dinhi sa Syudad sa Sugbo, nakig- coordinate sab ang DCT uban nilang Eric Bucoy aron motumaw ang Let’s DO (Duterte-Osmeña) It.