Kanhi katabang sa balay kadete sa PMA
NAG-ESKWELA pa lang si Meriam Libongcogon, siya na ang nagsuporta sa iyang pamilya pinaagi sa allowance nga iyang madawat gikan sa Philippine Military Academy.
Bata pa lang si Meriam nakakat-on na siya sa panikaysikay sa kinabuhi aron makatungha ug makatapos sa kolehiyo.
Iyang gimatud-an nga ang kakabos sa ilang pamilya dili babag aron makab-ot ang iyang mga damgo.
Sa dihang nagtungha pa si Meriam sa Grade 2, namaligya siya og pan tiktik ug budbod sa ilang classroom.
“Wa ko mauwaw kay kon naay amutan sa eskwelahan, makabayad ko,” sumala sa 24-anyos nga dalaga.
Aron makatigom og kwarta, nanghakot siya og kahoy alang sa ilang mga silingan ug nanag-ob og tubig.
Si Meriam nibalik lantaw nga gumikan sa kawad-on sa ilang pamilya, sagad kamote o saging ang ilang kaunon, malipay na sila kon makakaon og bugas humay.
Nakahinumdum siya sa iyang bawon nga mais nga giputos og dahon sa saging ug hatagan siya og sud-an sa iyang mga klasmeyt, ang sobra gipaambit niya sa iyang mga manghod.
Sa dihang bata pa siya, nagsamadsamad usab ang iyang mga kamot sa pagpanguha og sagbot nga bukal nga maoy gipakaon sa mga mananap nga binatnan sa iyang amahan nga si Mario, 47; ug Florida, 45.
Si Meriam nakatapos sa elementarya isip valedictorian.
Sa high school, nahimo siya nga eskolar ug stay-in nga tinun-an sa Sisters of Mary Girls Town sa dakbayan sa Talisay.
Sa unang duha ka semana, gibati siya og kamingaw sa iyang mga ginikanan ug unom ka mga igsuon. Siya ang ikaduha sa kamaguwangan.
Diriyot pa siya wa makatapos sa 4th year high school sa dihang nagsakit siya og toxic goiter ug nakahukom ang tagdumala sa SMGT nga papaulion siya.
“Nihilak ko, dili ko gusto mouli ato kay gusto ko molampos. Kay kon mouli ko, di nako makaeskwela. Mag-unsa naman lang ko,” saysay ni Meriam sa pakighinabi sa Superbalita Cebu sa ilang panimalay sa Barangay Singsing, lungsod sa Balamban sa miaging semana.
Gitugtan siya makapadayon sa iyang pagtungha human siya mipirma ug ang iyang inahan og waiver ug wa niya usiki ang oportunidad sanglit nahimo siya honor student sa ilang graduation. Human siya makatapos sa high school niadtong 2007, nanarbaho siya isip katabang sa anak sa nagkugos niya nga taga Balamban, sud sa kapin usa ka tuig.
Sa kagustuhan nga makaeskwela sa kolehiyo, nibalhin og lain nga agalon si Meriam sa siyudad sa Sugbo diin ang iyang sweldo maoy gigamit niya sa pagtungha sa Southwestern University sa kursong computer engineering.
Una niyang pangandoy nga mahimong maestra maong nibalhin siya og kurso sa Secondary Education major in Mathematics.
Ang iyang suod nga klasmeyt nga babaye nihatag niya og usa ka set sa uniform sanglit maglisod siya og palit samtang ang sobra sa iyang sweldo maoy gipalit niya og mga libro.
Niabot sa punto nga nawagtangan og gana si Merim ug wala na makasabot sa iyang kinabuhi hinungdan nga nipauli siya sa ilaha.
Sa ikatulong pagpangamo niya, didto na siya napadpad sa Baguio nga iyaan sa ilang silingan nga adunay anak nga maestro sa PMA nga si Rosita Villareal.
Si Meriam, utokan maong gitambagan siya sa iyang agalon nga mokuha og entrance
exam sa PMA. Niadtong Septiyembre 2012, gihatagan siya og notisya sa PMA nga nakapasar siya sa examination ug pagka Nobiyembre gipa- report siya sa V. Luna General Hospital alang sa iyang medical exam.
Hapit pa siya wa makaapas sa pagduso sa mga rekisitos tungod kay diriyot malangay ang pag-abot sa iyang credentials sa tunghaan.
Pagka Abril 1, 2013, opisyal siya nahimo nga babaye kadete sa PMA, umaabot nga tigpanalipod sa nasod.
Sa sinugdanan, ang iyang inahan wala mosugot tungod kay hinayon ug luyahon nga pagka babaye si Meriam.
“Ako siya giingnan ayaw ana day kay maigo ka sa bala... Nidesisyon siya og iyaha ra. Daghan kaayo ni- discourage niya ato,” naghilak nga asoy ni Florida.
Apan, si Meriam, tibuok ang hukom nga mopadayon sa PMA ug determinado siya nga motapos aron mahimo nga sakop sa Philippine Navy. “Gi-grab nako ang opportunity kay libre na akong pageskwela, mura pakog naay trabaho kay naa koy allowance unya makahatag pako sa akong pamilya. Mao ni ako gipangita gyud,” gipamulong ni Meriam, diin tipik sa iyang P27,000 nga
allowance matag buwan ang ipadala niya sa iyang pamilya sa Balamban alang sa ilang inadlaw-adlaw nga panginahanglan.
Karong Marso sa sunod tuig, mo- graduate siya sa PMA ug mobanos ang iyang manghod nga babaye nga iyang gipatungha karon sa Baguio.
“Nagpasalamat ko sa Ginuo nga gihatagan mi Niya og anak nga naningkamot moeskwela bisan sa among kalisod,” matod ni Mario, usa ka construction worker.
Si Meriam nitambag sa kabataan labi na ang gikan sa kabos nga pamilya nga magmainantuson, maningkamot ug dili mawagtangan sa paglaom sa pagkab-ot sa ilang mga damgo.
“Kanang kapobre dili babag sa imong pangandoy kon maningkamot ka lang. Paglantaw sa imong future, hunahunaa nga motabang sa ginikanan kay nindot sa pamati makatabang sa uban,” dugang ni Meriam.