Ala boxers, inilang mga Pinoy athletes nalakip sa ID Stations sa Sports+Action

GIPANGBIDA sa Sports+Action ang Pinoyng mga atleta nga nakahatag og dungog sa nasod sa bag-o nilang station ID nga gipagawas kagahapon atol sa kasaulogan sa National Heroes’ Day.

Ang video, nga migamit sa orihinal nga komposisyon sa rapper nga si Quest, mipakita sa nagkadaiyang dekalidad nga atletang mga Pinoy nga nakuhaan sa camera sa ABSCBN Integrated Sports sa milabayng katuigan.

Naglakip niini ang ALA boxers nga sila si Donnie “Ahas” Nietes, Jason Pagara, Mark “Magnifico” Magsayo lakip na ang world champion nga si Nonito “Filipino Flash” Donaire.

Naa sab ang volleyball stars nga sila si Alyssa Valdez ug Grethcel Soltones, De La Salle University basketball hotshot Jeron Teng, ug Arellano University star point guard Jio Jalalon.

Tinguha sa station ID nga mapasabwag ang kasinatian sa Pinoyng mga atleta sa pagkab-ot sa kalampusan nga nahimong posible tungoid sa ilang determinasyon, paningkamot, sakripisyo ug gugma sa yutang natawahan.

Giulohan og “Sumasaludo sa Pusong Palaban ng Lahing Pilipino,” ang video unang gipakita sa noontime show “It’s Showtime” kagahapon human gipasidunggan sa programa sila si Olympics silver medalist Hidilyn Diaz ug ONE heavyweight champion Brandon Vera.

“Nakita ko ‘ yung tibay ng loob ng bawat atleta, at ‘yung pagiging proud nila na maging Pilipino at i-represent ang Philippines,” matod ni Diaz kabahin sa station ID.

“I’m getting goosebumps now,” batbat sab ni Vera. “It’s really amazing to see the talent and the heart, the dedication of the Filipinos.”

Si Teng mapasigarbuon nga nahilakip siya sa station ID, nga iyang gihulagway nga madasigon alang sa ubang mga atleta.