1 PATAY SA PAGKAHUGNO

Nag-welding nga 20 anyos nadat-ugan sa paril

NAMATAY ang usa ka welder human nga aksidente nga nahugnoan sa steel bar nga gitrabaho sa gitukod nga Casa Mira Towers sa dan Salvador Extension, Barangay Labangon, dakbayan sa Sugbo kagahapon sa buntag.

Ang biktima giila nga si John Eric Llera, 22, lumad sa Brgy. Canlumampao, dakbayan sa Toledo.

Matod ni PO3 Cristobal Geronimo sa Homicide Section sa Cebu City Police office nga gideklarar si Llera nga dead on arrival sa tambalanan pasado alas 10 sa buntag kagahapon.

Sa inisyal nga pakisusi sa homicide section nasayran nga ga- welding niadtong tungora si Llera sa ubos nga bahin sa sheet pile nga hinimo sa mga steel bar, sa dihang kalit nga nahugno.

Ang sheet pile mao ang gihimo nga pundasyon sa ubos nga bahin alang sa pagtukod sa edipisyo.

Matod ni Geronimo nga nadat-ugan si Llera sa mga steel bar ug yuta hinungdan sa iyang hinanaling kamatayon.

Usa ka barangay tanod sa Labangon nga si Jose Wesley Cellona daling niadto sa lugar kahahapon human nahibaw nga nalusno ang gikubkob sa maong construction site.

Didto ila pang nakita nga adunay tawo nga gihigtan og pisi ang hawak, gibira og backhoe ug daling gipasakay sa ambulansiya nga mao si Llera.

Gisalikway hinuon sa kapulisan ang hugon-hugon nga aduna pay laing mga construction worker nga naangol.

Estrikto ang management sa maong construction site, nga J.E Abraham Lee Construction and Development Inc., diin ang project Engr. mao si Adonis Gabutin.

Sirado ang gate sa lugar ug way bisan usa sa mga sakop sa media ang nakasulod. Di usab basta-basta nakasud ang kapulisan. Giingong mando sa management nga ipapalong ang mga cellphone sa ilang trabahante, ug gipahunong usab una sila sa pagtrabaho.

Gibuksan ang dapit human mohangyo si Bise Mayor Edgardo Labella nga pasudlon sa dapit.

Apan nilanat pa og mga 30 minutos una nakasulod ang bise mayor.

Matod ni Labella nga nahulpa ang gikubkob sa may habig sa karsada ug naapil pagkahulog ang poste sa usa ka telecommunication company.

Ang bise mayor niingon nga kinahanglang moreport ang developer ngadto sa Siyudad.

MISUSI

Si Cebu City Councilor Jerry Guardo, kinsa maoy chairman sa committee on infrastructure, nakasud sa area human sa pipila ka minutos nga pagpaabot, kagahapon, iyang gibutyag nga sa dihang gipangitaan niya ang project engineer og excavation permit wa kini napakita, ug igo ra nibutyag nga gitrabaho pa nila ang permit, hinungdan nga susihon ni Guardo sa Office of the Building Official hilabi na nga aduna nay nahitabong excavation activities sa lugar.

Si Engr. Josefa Ylanan, officer-in-charge sa OBO, nibutyag nga niadtong Agusto 1 giaprobahan ang pag- demolish sa dakong edipisyo sa AB Soberano apan wa silay giisyu nga laing permit.

Matod ni Ylanan ilang gipahunong ang pagkawot, pag- construct sa building, apan mahimong matrabaho sa developer ang dapit nahugno.

Siya nidugang nga naghuwat pa siya sa report sa iyang mga engineer nga nisusi sa mao nga dapit aron pagtinod kinsa ang nakasala sa mao nga hitabo.

Nakita ni Guardo nga dili stable ang lugar nga nahulpaan kay tubigon ug aduna pay poste sa usa ka telecommunication company ang lakip sa natumba.

Matod sa konsehal nga iyang gitambagan ang project engineer, alang sa dinaliang pagtrabaho sa lugar nga nahulpaan, human nga usa ka poste sa Visayan Electric Company (Veco) ang hapit na usab matumba ug posible nga makaapektar sa mga residente sa lugar.

Gitug-an ni Guardo nga makig-alayon una siya sa OBO, una siya morekomendar alang sa stopage order apan kinahanglan usab nga trabahuon una dayon sa kompaniya ang lugar nga nakitang di stable diin hapit na matumba ang poste sa Veco.

Dugang ni Guardo nga angay nga morekomendar og stopage order, hilabi na kon makita nga kuwang sa mga dokumento o permit ug pagsiguro nga mopatuman na sa safety measure sa construction aron wa nay kinabuhi pa nga makalas o mameligro. Hayan pasakaan ang responsable sa pagkahugno og reckless imprudence resulting in homicide. Gisulayan sa pagkuha sa habig ang nagdumala sa J.E. Abraham Lee Construction apan gibutyag sa gwardiya, nga wa nay tawo sa buhatan kay half day hinungdan nga wa pa’y opisyal nga pamahayag gikan sa construction firm ug sa Casamira Towers kalabot sa nahitabo.