Mipatay sa seaman, patay sab
NAPATAY sa kapulisan ang kanhi asset ug kanhi barangay tanod nga nisuway pagsukol kanila dihang ila untang dakpon human kini makapusil patay sa usa ka seaman nga iyang naalaan nga iyang kontra pasado alas 2 kagahapon sa kaadlawon sa eskina V. Gullas ug dan Mabini, dakbayan sa Sugbo.
Sa wa pa mapusili sa kapulisan si Geroncio Morales, 44, taga Brgy. Quiot, nag-abang sa usa ka boarding house sa dapit, iyang gikasukmagay ang usa ka tawo samtang siya nag-inom.
Kay siya nalupig, si Morales nidagan sa boarding house aron pagkuha og pusil.
Sa iyang pagbalik, iyang naabtan si Anthony Branzuela, 22, usa ka seaman, taga Zamboanga del Sur, temporaryong nagpuyo sa dapit, nga nagbarog sa usa ka barbekyuhan.
“Naala-an niya kay ang lawas sa iyang gikasinumbagay anggidanggid man ni Branzuela,” matod pa ni PO3 Winston Ybañez sa Homicide Section sa Cebu City Police Office (CCPO).
Iyang gipusil si Branzuela tumong sa ulo samtang nagtalikod.
Human matumba si Branzuela, nidagan balik sa boarding house si Morales ug naalarma ang kapolisan sa Waterfront.
Niresponde si Chief Inspector Conrado Manatad, hepe sa Waterfront Police, uban sa Special Weapons and Tactics (Swat).
Sa dihang gipagawas na ang mga tawo sulod sa boarding house, si Morales wa motahan.
Iyang gipasalbahan ang mga sakop sa Swat nga misud.
Wa magdugay, nadungog sa mga tawo ang sunodsunod nga mga buto hangtud nga nakita ang biktima nga nagbay-ad sulod sa lawak nga patay nga may mga samad pinusilan.
Nabawi sa kapolisan duol sa lawas ni Morales ang usa ka kalibre .38 nga revolver uban sa mga bala ug usa ka kabhang.