3 gipamusil, 1 namatay
TULO ka mga tawo gipamusil sa mga Dakbayan sa Sugbo ug Mandaue.
Gidudahan nga gikan “nanuyop” ang duha ka mga lalakeng gipamusil samtang nagmotorsiklo sa may dalan Magsaysay, Barangay Pasil, dakbayan sa Sugbo.
Ang napatay giilang mao si Benjamin Decatoria, taga Lahug samtang ang nasamdan mao ang habalhabal driver nga iyang gisakyan nga si Ronald Publica, 27, taga Sentro, siyudad sa Mandaue.
Si Publica nga samdan sa tiyan nagkanayon nga misakay kaniya si Decatoria ug nagpahatud sa maong lugar.
Sa dihang paingon na sila mogawas, duha ka wa hiilhing tawo nisugat kanila ug dayong pusil makadaghan kang Decatoria samtang nasamdan si Publica.
Nakadawat og impormasyon ang kapolisan nga gikan nisuyop sila si Publica ug Decatoria.
Samtang usa ka lalake gipusil-patay sa wa pa mailhing mamumuno sa B. Ceniza St.,Brgy. Centro, dakbayan sa Mandaue niadtong Martes sa gabii.
Ang biktima giila nga si Jimmy Vargas, hingkod, may live- in partner nga taga Zone 3, Mantuyong sa dakbayan, giingong notadong esnatser.
Matod ni PO1 Bernard Salimbot sa Station 1 sa Mandaue City Police Office (MCPO) nga duha ka anggulo karon ang ilang gitan-aw nga maoy motibo sa pagpatay.
Base sa ilang imbestigasyon, ilang nasuta nga si Vargas may nakalalis nga grupo sa mga lalake sa milabayng semana.
Samtang, Oplan Pokemon maoy isunod sa pagpatuman sa kapulisan sa syudad sa Sugbo human sa sunodsunod nga Oplan Tokhang sa duha ka buwan nga nakalabay.
Ang oplan Tokhang mao ang pagtoktuk sa drug personalities aron motahan.
Kon magpadayon sa pagmagahi sa pagsanong sa hangyo sa kapulisan, ilang ilusad ang Oplan Pokemon.
Matod ni Sr. Supt. Joel Doria, hepe sa Cebu City Police Office nga sama ra kini sa konsepto sa double barrel diin kadtong mga high value target ug low value target nga drug personalities maoy target.
Gipakisama sa duwa nga Pokemon Go ang oplan Pokemon diin pangitaon kadtong mga kriminal nga nakahimo ug illegal nga kalihukan.
“Ang purpose natin dito is we will be capturing all the pushers and high value targets and low value targets dito sa Oplan Double barrel natin” matod ni Sr. Supt. Joel Doria.