3 KA MGA PUSHER NASIKOP SA MOTEL
DAKPAN. Nadakpan sa kapulisan sa miaging gabii sud sa usa ka motel sa dakbayan sa Lapu-Lapu ang mga suspetsadong drug pusher nga sila si Romeo Amistad, 29, taga Poblacion, Cordova; Valeriano Degamo, 37, taga Poblacion sa samang lungsod; ug si Elmer L. Tagsip, 44, taga Brgy. Gabi. Nakuha gikan kanila ang drugas ug armas. Mga transaksyon sa tulo sa motel gipahigayon aron di madiskitahan.
MOABAG ang mga mga tagiya sa mga bay kahilayan sa Metro Cebu sa kampanya sa kapulisan batok sa illegal nga drugas.
Uban nga mga tag-iya nagduda nga dunay mga bar manager nga nangunay sa pagpamaligya sa illegal nga drugas sa ilang mga batanong kustomer.
Nagtigom ang di momenos 100 ka mga tag-iya sa mga balay kahilayan dinhi sa Metro Cebu aron ilang ipakita sa kapulisan ang ilang pagsuporta sa kampanya ni Presidente Rodrigo Duterte pagbatok sa illegal nga drugas.
Usa ang mga bay kahilayan ang gituohan nga dunay mahitabong transaksyon sa illegal nga drugas alang sa mga batan-on nga mogamit og party drugs nga nauso sa kaulohan.
Si Nixon Dizon, tag-iya og imnanan nga naa nahimutang sa Mango avenue, nagkanayon nga uyon siya nga panid-an sa kapulisan ang mga imnanan ug di na angay mananghid pa sa management sanglit siya nagduda nga dunay mga manager nga nalambigit sa illegal nga drugas.
“Common practice na man na. Dili ta kalikay nga ang atong empleyado ug ang atong managers mao nay mamaligya ba. Kinsa man diay mamaligyag party drugs? Kinsa may naa dinha basically? Mao na ako gi question ni city director nga much better nga dili pahibawon ang mga managers kon mag surveillance kay basin ang mo-tip sila ra,” matod ni Dizon.
Matod ni Sr Supt. Joel Doria, hepe sa Cebu City Police Office, nga ang pagpamaligya og drugas sud sa mga balay kahilayan gihimo sa sekreto nga paagi diin kadto lamang mogamit ug ang namaligya ang nasayod nga himuon sud sa pansayan sa bar.
Tungod niini, dunay mga nakasibilyan nga pulis ang mohimo og surveillance bisan kon wa pa sila makakuha og kongkretong impormasyon nga duna nay party drugs sa mga imnanan.
Giangkon hinuon niya nga sa pagkakaron wa pa sila maka monitor nga dunay presensya sa party drugs sa mga imnanan sa dakbayan sa Sugbo.
Giangkon sa mga bar owners nga wa pa sila makamugna og kahugpongan sa mga tag-iya sa mga imnanan dinhi sa Sugbo.
Tinguha nila nga magtukod og asosasyon aron matabangan ang kapulisan sa paghatag og kasayuran kinsa kining nalambigit sa illegal nga drugas.
Matod ni Tito Avila, konsehal sa barangay Kamagayan apan dunay imnanan nga negosyo, nga naa sa sulod mismo sa bar ug sa gawas ang transaksyon sa illegal nga drugas nga angay sumpuon sa kapulisan pinaagi sa ilang pag abag.
Pinaagi niini masumpo na ang pagkuyanap sa illegal nga drugas nga gipanghimo sud sa mga imnanan.
Niadtong milabayng katuigan, ang kapulisan sa dakbayan sa Sugbo ug ang Philippine Drug Enforcement Agency (PDEA 7) nakasikop sa usa ka drug pusher nga nasakmitan og Ecstacy sud sa usa ka club nga maoy gipamaligya sa mga kustomer nga batan-on.
NASIKOP SA MOTEL
Tulo ka mga lalake nga micheck in sa usa ka motel sa dakbayan sa Lapu-Lapu nasikop sa dihang didto sud sa giabangan nilang lawak nga namaligya ug nagbahig sa shabu.
Sayop ang pagtuo sa tulo ka mga suspek nga pulos taga lungsod sa Cordova, Sugbo nga dili sila mamatikdan sa kapulisan sa ilang illegal nga negosyo pinaagi sa pag- check in og short time sa maong establisemento.
Ang mga sakop sa Intelligence Branch sa Lapu-Lapu City Police Office nga nakadawat og impormasyon ug nipahigayon og buybust operation niadtong Martes sa gabii nga niresulta sa pagkasikop nila ni Romeo Amistad, 29; Valeriano Degamo, 47 ug Elmer Tagsip, 44.