Herrera mihimo og ‘tokhang’ sa south bus terminal
LAING hugna sa drug test gipahigayon sa Cebu Provincial AntiDrug Abuse Office (CPADAO) sa Cebu South Bus Terminal (CSBT).
Atol sa drug test, si CSBT operations manager, Joey Herrera, nihimo sa iyang kaugalingong “tokhang” ug niapelar sa mga adik nga driver, konduktor, dispatcher ug ambulant vendor nga mosurrender ug motugan nalang sa ilang dautang binuhatan.
Sa 70 nga nipatest, lima ang positibo sa illegal drugs.
Wa pay 10 minutos sukad niluwat si Herrera sa ultimatum, siyam ka mga tawo ang nitahan ug niangkon nga sila tiggamitan og drugas. Kini naglakip sa vendors, konduktor ug bus helper.
Ang 36 anyos nga konduktor nga tagaCarcar City, maoy unang niangkon nga mogamit siyag drugas.
Niadtong Biyernes maoy uwahi niyang paggamit niini. Posibleng ikonsiderar sa CSBT management ang pagpabalik sa mga niangkong adik kon sila hingpit nga magbago sa ilang kaugalingon.
Nunot sa ilang pagangkon, temporaryong gikuha ang ilang accreditation ID ug di una sila makatrabaho.
Matod ni Herrera nga kadtong mga nipaubos sa drug test apan mogawas nga positibo sa paggamit og drugas maoy di na nila pabalikon sa terminal.
Sa laing bahin, nipahigayon sab og drug test ang CPADAO sa Argao District Hospital niadtong Martes. Hinuon sa 62 nga napaubos niini, walay nagpositibo.
Kagahapon sa buntag, 67 ka mga kawani sa Minglanilla District Hospital ang gipaubos sa random drug test, duha positibo apan kinahanglan pa kining ipaubos sa confirmatory test.