Brgy. San Antonio milusad sa kampanya batok dengue

USA ang Barangay San Antonio, dakbayan sa Sugbo nga nitubag sa panawagan sa Deparment of Health (DOH) 7 sa paglusad sa pagkampanya sa pagsisik ug pagpuhag sa mga gipangpuyan sa lamok ug pagpakusog sa ekukasyon sa katawhan bahin sa dengue fever.

Dili pa lang dugay, si Barangay Kapitan Alan Masecampo nangulo sa team sa mga opisyal sa barangay uban sa mga kawani sa DOH gikan sa dakbayan sa Sugbo nga naghimo og dengue awareness ug operasyon sa pagpatay sa mga lamok.

Giubanan ang team ni Dr. Naharanee S. Valdepinñas ujg ang chairperson sa committee on health sa barangay nga Hon. Aileen F. Sia, ang aktibong konsehal nga kanunay naglantaw sa kaayohan sa barangay ug kahiusahan sa katawhan.

Lakip sa team mao ang midwife sa barangay nga si Ester P. Garong, Barangay Health Worker (BHW Daisy Quijano, duha ka sanitary inspector ug mga kawani sa barangay.

“Sus, lisod gyud og dili tan manlimpyo kay peligro sa dengue,” matod ni Sia.

Nanawagan si Konsehal sa nagpuyo sa barangay nga manglimpiyo sa ilang palibot labi na sa pagyabo o pagtabon sa mga sudlanan og tubig aron dili mapuyan og lamok nga nagdala sa virus nga hinungdan sa dengue fever..

“Manglimpyo gyud mo labi na nga tinguwan na. Susmaryosep, ipalayo lang intawon ang dengue,” dugang ni Sia, kinsa usa usab ka aktibong lumilihok sa simbahan.

Ang San Antonio gamayng barangay apan nahimotang ang usa sa mga sentrong dapit sa dakbayan, diin nasikop sa buhatan sa SunStar Publishing, Inc. ug ubang mga dagkong estabilimento.