Buta-bungol

MAKATUO na lang hinuon ko nga ang tawo mahimong dautan tungod sa iyang isigka tawo. dili unta ko gusting manaway, apan kining nagbaton ta og katarong, may ikasaway man gyud ta sa dili tarong. Mahikatawa lang hinuon ko nga maglagot. Hinuktoki kining nahitabo nako.

Sabadista ko. Akong asawa nga si Abet, Katoliko kaniadto, apan human mi maminyo mikuyog siya nako ug nagpabunyag sa among relihiyon. Nagpuyo mi sa usa ka ‘compound.’ May Sabadista sab ming silingan, sila si Edwin ug Delia, bana ug asawa nga ka-edad namo. May duha sila ka anak nga katalirungan sab sa among duha ka anak. Ang tag-iya sa compound nga si Mr. Terio Castro dili partikular sa relihiyon. Iyang inahan Iglesia; iyang amahan kay Katoliko. Iyang asawa Katoliko, apan dili sila hinimba. Para nako, way labot ang relihiyon ining hitaboa kundi ang kinaiya gyud sa tawo.

Pero bisag unsa ka-relihiyuso ang tawo, bisag unsa ka hinimbahon, o bisan unsa ka-Diyosnon, makaingon ta nga duna gyuy pagbati ang tawo sa iyang isigka tawo nga dili maayo. Sa lihok lang o sa tinan-awan matataw kini usahay. Sama ni Delia. Nakasabot ko nga may kasuya siya kang Abet. Bisag asa sila magabot di motingog si Delia kang Abet. Hinuon tan-awon niya si Abet gikan sa ulo ngadto sa tiil. Well, di pagpanghambog, guwapa akong asawa. Maayo siyag lawas ug maayong manghindik. Maayo sab mamustora. Mas guwapa siya kay kang Delia. ‘I love my own’ man sab gyud ta. Kami si Edwin hinuon, magtinagdanay man mi. Wa mi problema sa paguwapohay.

Dunay ‘gate’ among compound nga gipuyan. Daghang higayon nga mag-abot sila si Delia ug Abet sa ‘gate.’ Kon mahiuna si Abet pagsulod, dili niya sirhan dayon ang ‘gate’ aron makasulod si Delia. Pero kon si Delia ang makaunag sulod, sirhan dayon niya ang ‘gate’ bisag nakita niya nga naa si Abet sa iyang luyo. Kandaduhan gyud. Duna man hinuon mi tagsa ka yawe. Makita gyud sa lihok ni Delia nga may disgust siya sa akong kapikas.

“Unsa man kahay naa sa utok anang bayhana, Doning?” reklamo ni Abet ngari nako usa ka higayon.

“Iya na nang problema kon duna siyay kasuya nimo. Ang tawong masuya nagpaabot lang nga lupigon siyas iyang gikasuyaan,” tubag nako.

May mga Sabado nga mobisita namo akong mga ugangan nga sila Papa Ritchie ug Mama Eleanor. Magdala silag sakyanan. Unya pahuwamon mi sa sakyanan kon manimba mi. Usa ka higayon sa pagpamauli namo, wa tuyoa nga naka- hitch ride si Delia sa sakyanan. Kuyog niya ang iyang mama nga si Nang Gingging. Maayo mag relasyon sila si Abet ug Nang Gingging.

Gihagad ni Abet si Nang Gingging nga mosakay sa akong gimanehong sakyanan. Nakasakay og apil si Delia. Unang nanaog si Nang Gingging ka yang iyang balay malabyan man namo padulong sa compound. Pag-abot namo sa ‘gate’ nagdahom ko nga moboluntaryo si Delia pag-abli sa ‘ gate’ kay si Abet nagkugos pa sa among kinamanghuran nga si Meme.

Nagsiga lang ang mga mata ni Delia. Wa gyud manaog sa sakyanan. Naghulat gyud siya nga makasulod ang sakyanan sa compound una pa manaog. Way sentido kumon! Wa makahunahuna nga unta nakapabor man siya kay gipasakay, tan-awon sab unta niya kon unsay pabor nga iyang ikatampo.

Ako na lang ang nanaog ug miabli sa ‘ gate.’ Si Delia daw prinsesa gyud siya sulod sa sakyanan. Pag-urong sa sakyanan sulod sa compound nanaog siyang way tingog-tingog. Gamay ra man unta ning butanga, apan pagka ngan unta nga relihiyusa, hinimbahon o Diyusnon kang pagka tawo, bukid ba diay sa imong nga ang pagpasalamat sa gamay pabor? O buta-bungol ka ba lang sa pagtulon-an sa simbahan?