467 BALAY NAUGDAW
573 ka pamilya sa Duljo wa nay kapuy-an
LABING minos 573 ka mga pamilya ang nangawad-an og pinuy-anan human mangaugdaw ang gibana-banang 467 ka mga balay sa sunog sa Brgy. Duljo Fatima nga nagsugod mga alas 11 pasado sa gabii niadtong Huwebes apan hingpit nga napawong mga alas 6 kagahapon sa buntag.
Samtang malangay usab ang bunyag sa usa ka buwan nga batang babaye nga si Daniella tungod kay nahurot usab og kaon sa kayo ang ilang balay.
Nilungtad sa unom ka oras nga grabeng kayo ang giisip nga labing dako nga sunog sa dakbayan sa Sugbo karong tuiga nga nakaapekto og 2,601 ka mga tawo.
Sa natala Social Welfare Services, alas 9:00 sa buntag kagahapon, niabot na usab sa 467 ka panimalay ang apektado sa unom ka sitio sa maong barangay.
Lakip sa Sitio nga apektado sa sunog ang Sitio Bohol, Riverside, Saduco, Continental, ug Sto. Niño.
Mga siyam usab ka tawo ang nangaangol, duha niini mga bombero.
Ang mga angol nga mga lumolupyo mao sila si Meleton Adorna, 69; Rodrigo Fernandez, 19; Paulino Tudtud, 51; Jackielyn Ceniza, 37; Renelle Anabia, 17; Efronio Alido, 60 ug iyang anak nga si Alfred, 27.
Duha ka mga bomberong nangaangol mao sila si FO1 Junard Afable ug SFO1 Rafael Basabe.
Alas 11:14 sa gabii niadtong Huwebes dihang nadawat sa Cebu City Fire Department ang alarma sa sunog sa maong dapit.
Nakontrolar ang kayo mga ala 1:08 na sa kaadlawon.
Nagsugod ang kayo sa ikaduhang andana sa balay ni Marivic Sermillon nga giukopar sa iyang anak nga si Roland Ceballos.
Ang balay way sugang dagitab mao nga naggamit og kandila ang mga nagpuyo.
Sa pagsuwat ning taho, wa pa matino ang hinungdan sa kayo.
NAGLAUM
Ang mga residente dali usab nga nag-iyahay og salbar sa ilang mga gamit gumikan sa paspas nga pagkatap sa kayo.
Usa niini ang apohan ni Daniella nga si Angeline Amad, 58-anyos kinsa nakamata nalang nga dako ug init na ang kayo.
Dali niya nga gipangdala ang mga apo niya nga pito kabuok aron dili kini maangol sa kayo.
Si Amad kinsa usa ka tindera og utanon sa Carbon Public Market, malaumon nga makabalay sila sa di pa ang Pasko.
Nibutyag usab siya nga mao na kini ang ikaduhang panimalay niya nga naugdaw sa sunog apan ang uwahi mao ang labing dako.
Ang managtiayon nga sila si Carmencita, 72 ug Eleuterio Abayan, 71, kinsa naugdaw usab ang panimalay, nanghangyo kang Cebu City Mayor Tomas Osmeña nga unta himuong P3,000 ang senior citizen nga financial assistance nga gikatakda nga madawat nila karong buwana.
Nakontrolar sa kabomberohan ang kayo ala 1:08 sa buntag diin na- fireout kini alas 6:25 sa buntag na kagahapon.
Nasayran nga gikan sa panimalay ni Marvic Sermillon nagsugod ang kayo diin nasagdan nga kandila ang hinungdan human wala sila’y kuryente.
Samtang padayon usab ang pagkuha og impormasyon sa kabomberohan sa usa ka residente nga nipabuto sa iyang armas atol sa maong sunog.
Sa video sa usa ka firefighter nga si Vhanrold Monteron, usa ka lalake nga nagsul-ob og puti nga t-shirt nga aduna’y “I love Japan” ang nipabuto og katulo sa kalibre .38 niini nga armas paingon sa giingon nga laing volunteers.
Apan si Cebu City Fire Marshall Regelio Bongabong sa iyang bahin base sa iyang nakita sa video nagkanayon nga sa jalousie gipabuto sa lalake ang armas niini ug di sa alegasyon nga didto paingon sa mga volunteer.
Wala hinuoy natala nga naangol o samdan sa maong pagpabuto.
Hinuon, padayon ang imbestigayon sa kapulisan ug kabomberohan tungod kay dili makiangayon ang pagpabuto og armas.
Niabot sa Task Force Alpha ang maong sunog.