Recla tukoron sa Minglanilla

USA ka gatos ka esktaryang reclamation project sa lungsod sa Minglanilla pormal nang gipirmahan tali sa lungsod, Philippine Reclamation Authority (PRA) ug sa developer. Sa higayon nga mahuman ang proyekto makamugna kinig trabaho sa di moubos 75,000 ka mga tawo.

Ang memorandum of understanding (MOU) gipirmahan mismo sa mga opisyal sa lungsod nga pinangulohan ni Mayor Elanito Pena, Bise Mayor Robert John Selma; chairman sa PRA nga si Atty. Albert Agra, bag-ong general manager ug CEO nga si Atty. Janilo Rubiato ug ang developer nga mao si Ming- Mori Development Corp. chairman Jose Soberano.

Si Pena miingon nga ang reclamation project maoy katumanan sa ilang damgo sukad pa kaniadto nga makapahigayon silag reclamation project aron molambo ang ilang panudlanan.

Apan labaw sa tanang daghang trabaho ang mamugna diin ang taga lungsod sa Minglanilla maoy unang makapahimulos.

Samtang si Soberano nibutyag nga ang reclamation project industrial ug commercial park diin gawas sa mga kompaniya nag mobutang sa ilang negosyo sa lugar aduna usay mga commercial area.

Matod niya nga daghan nang mga negosyante sa Japan ang mipahibawo nga mobutang sila sa ilang negosyo kon mahuman na ang reclamation.

Hinungdan nga ila kining gipanganlan og Ming-Mori sanglit ang Ming nagpasabot nga Minglanilla samtang ang Mori usa ka dakong kompaniya didto sa Japan.

Sa ilang bahin si Rubiato sa PRA mipasabot nga ang MOU nagpasabot nga ang developer mahimo nang makaduso sa ilang tanang mga kinahanglan sama sa Environmental Compliance Certificate (ECC) feasibility study, ug uban pa sa tuyo nga ilang matun-an.