PRO 8 mipahimangno sa katawhan nga magbantay

ORMOC CITY, Leyte - Mipahimangno karon ang Police Regional Office (PRO) 8 sa katawhan nga pabiling magbinantayon.

Kini human mianunsyo si Police Director General Ronald ‘Bato’ Dela Rosa nga gipaubos karon sa terror alert level 3 ang nasud.

Si P/CInsp. Bella Rentuaya, tigpamaba sa PRO 8, nagkanayon nga wa pay gipagawas nga direktiba ang ilang regional operations division.

Hinuon, wa namay na-monitor nga hulga sa terorismo ang rehiyon apan di kini igo nga magkampanti na sila kay bisan unsang orasa posible dunay mahitabo.

Mimando hinuon si PRO 8 director Elmer Beltejar nga pakusgan pa ang ilang police visibility ug intelligence effort aron mapugngan ang bisan unsang krimen ilabi na karong Christmas season.

Dugang ni Rentuaya, giseguro nila nga dunay mga pulis nga naka-istambay matag oras sa mga vital installation.

Sama sa mall, pantalan, airport, bangko, plaza, merkado, terminal ug ubang mga lugar nga sagad dagsaon sa mga tawo.

Giawhag usab sa kapulisan ang publiko nga magmatngon sa bisan unsang klase nga modus operandi sama sa Salisi gang.

Dugang awhag sa kapulisan sa publiko nga i- download ang bag-ong application sa cellphone nga PNP i-serbis.

Makita niini ang modus sa nagkadaiyang grupo ug makatabang kini unsaon paglikay sa naasoyng modus.