Ang pikas habig sa Sugbo
BISAN pa man niining mga panagbikil sa atong mga political leaders nga maoy maghatag sa publiko og mga negatibong panglantaw, wa kini mahimong babag ug wa makatarog sa pag-aninaw sa mga butang nga nagdala usab og maayong imahe sa atong pinangga nga Sugbo.
Di ikalimod nga sa matag adlaw natong paklid sa mga pamantalaan, pagpaminaw sa radio ug telebisyon, mosugat sa atong kabuntagon ang mga madugoon nga panghitabo ug kontrobersiyal nga mga isyu.
Apan taliwala ning tanan, ang Sugbo mapasigarbuhon sa gihapon human kini maoy pinakadaghang nahagdaw nga pasidungog sa bag-o lang gipahigayon nga Choose Philippines Awards didto sa ABSCBN Dolphy Theater sa Kaulohan.
Sa ato pa, kon turismo ang hisgutan, ang Sugbo dili usab hibintahaan.
Ang mga kategorya nga gidomina sa Sugbo mao ang Best Accommodation (Plantation Bay Resort and Spa), Best Water Form (Kawasan Falls) ug Best Festival (Sinulog).
Ang pagpili gipaagi sigon sa pag- nominate sa mga netizens sa tibuok nasod kon kinsa ang ilang napilian nga haom sa nagkalainlaing kategoriya.
Gawas sa Kawasan Falls, ang ubang napili sa Best Destination category mao ang The Ruins sa Negros Occidental, El Nido Resorts (Palawan), Mayon Volcano ug Picnic Grove sa Tagaytay.
Kauban usab sa Plantation Bay sa Best Accommodation category mao ang Villa Escudero (Quezon), Stilts Calatagan (Batangas) ug Balesin Island (Quezon) samtang nag-inusarang milabni sa titulo ang Sinulog sa Cebu City sa Festival category.
Taliwala sa mga bati nga panghitabo, milutaw ra usab gihapon ang mga maayong butang nga mialkontra sa pikas habig. Congratulations, Sugbo!