Jordan, Woods nalakip sa pinakadatong US celebrities
ANG duha ka golfer nga sila si Tiger Woods ug Phil Mickelson ug ang kanhi NBA player nga si Michael Jordan nalakip sa 20 ka mga pinakadato nga American celebrities sa nga nalista sa Forbes magazine.
Si Woods, 40, ang pinakabata sa listahan nga may net worth nga $740 million. Siya nahimong major champion sulod sa 14 ka higayon, sunod sa 18 ka titulo ni Jack Nicklaus sa all time list.
Niadtong 2010 nagbuwag siya sa iyang asawa ug nawad-an og mga sponsors human mitug-an nga aduna siyay mga kabit.
Bisan pa niini, siya anaa sa ikapito samtang si Mickelson anaa sa ika-18 nga may net worth nga $375 million.
Si Jordan, 53, kinsa miretiro sa tuig 2003 ug giila nga maoy pinakamaayong basketbolista sa tibuok kalibutan, adunay $1.2 billion nga net worth nga igo na kaayo niyang nakapahiluna sa ikaupat nga puwesto, matod pa sa Forbes.
Ang nag-una mao ang filmmaker nga si George Lucas nga may $4.6 billion.
Gipasabot sa Forbes nga ang anaa sa listahan kadto lang mga citizen sa United States kinsa nangadato tungod sa ilang pagka ilado ug dili kay nailado tungod sa ilang pagkadato.