Mga panglantaw sa Year of the Rooster
GUMIKAN lagi kay mao pa man ang pagbukas sa tuig, dili nato kalikayan kining mga panagna ug panglantaw sa mga psychic. Ato lang sakyan apan dili angayan seryosohon kay kini mga panagna lamang. Ang Ginoo ra gyud ang nakakita kon unsa man ang atong ugma.
Base sa Chinese calendar, ang tuig 2017 mao ang tuig sa mga sunoy o Year of the Red Fire Rooster. Ang Chinese new year 2017, magsugod karong Enero 28 hangtud sa Pebrero 15 sunod tuig. Ang manok o sunoy mao ang ika-napu sa 12 ka mga zodiac signs. Ang 2017 mao ang ika-4714 nga Chinese year. Base sa Chinese Horoscope, ang tuig 2017 mao ang gi-ila nga Female Fire Chicken year. Sa teyoriya sa Chinese Horoscope, ang Chicken mao ang Female Metal nga dunay kalambigitan sa mahalon nga bato sa mga alahas sama sa bulawan. Gumikan niini ang tuig sa mga sunoy nagtimaan sa mga luho, katahum og kaabunda.
Ang Female Metal konektado usab sa fog or slow dirty air. Buot ipasabot, ang sunoy maoy mopahanap sa atong panglantaw ug mopalibog sa atong desisyon. Mao kini ang tuig nga kinahanglang motrabaho ug magbaton og igong pasensya aron makab-ot ang mga gitinguha. Hinuon ang Chinese astrology nagbutyag nga ang tuig sa mga sunoy puno sa intigridad ug katakos. Ang kakugi ug paningkamot maoy yawe sa pagkab-ot ug kalampusan sa tuig sa mga Sunoy.
Sa kinatibuk-an, napanglantawan nga ang tuig sa mga sunoy maayong tuig alang sa panarbaho ug negosyo. Alang niadtong mga dalaga ug ulitawo ang tuig sa mga sunoy napanglantawan usab nga maoy tuig sa kamenyuon. Alang niadtong mga menyo, ang tuig sa mga sunoy maayo usab nga tuig alang sa pagbaton og anak.
MGA PANAGNA
Ania ang pipila ka mga panagna sa nabantog nga mananagna alang sa 2017. Dinhi sa ato, napanglantawan sa iladong psychic nga si Madam Rosa nga matiwas mi Presidente Rodrigo Duterte ang iyang termino. Suma pa ni Madam Rosa dunay mga mosuway pagkutlo sa kinabuhi sa presidente apan dili kini molampos.
Nangpalantawan usab niini nga sa mosunod duha ka tuig mapatuman na ang gitinguha ni sa presidente nga pederalismo.
Nakita ni Madam Rosa nga malampusong malutsan ni Senador Leila de Lima ang managlahing kaso nga atubangon niini gumikan sa giingong kalambigitan sa ilegal nga drugas. Sumala pa niini, iyang napanglantawan usab nga padayong hulgaon sa managlahing bagyo, ang pipila ka bahin sa nasud diin ang uban niini mokutlo og mga kinabuhi. Masinati ang linog sa pipila ka bahin sa kabisay-an og kauluhan apan dili pa ang gipaabot nga “the big one”. Base gihapon sa vibrations ni Madam Rosa dunay mopanaw nga beteranong artista nga mopanaw gumikan sa balatian og magbabalaud nga mamatay sa aksidente.