BAG-ONG SHABU?
Kolor yellow nakuha sa PDEA; hayan sa Cebu ra gigama: Ruiz
PATAY ang usa ka lalake nga bag-o lang nakapasar sa board exam sa National Police Commission (Napolocom) sa gihimong buy bust operation sa mga sakop sa Philippine Drug Enforcement Agency 7 sa B. Aranas Extension, Barangay Duljo Fatima, siyudad sa Sugbo.
Nakugang ang mga operatiba sa PDEA human nila mapalgi ang shabu nga kolor yellow, inay puti sa ilang ronda.
Nagduda sila nga bag-o ang tiggama ning matanga sa shabu base sa kolor nga lahi sa naandan nilang nangasakmit.
Pasado alas 6 sa milabayng gabii girombo sa mga sakop sa PDEA 7 ang usa ka panimay nga matod pa gihimo nang suyopanan sa B. Aranas Extension.
Ilang target mao si Niño Taboada, 28, giingong bag-ong nakapasar sa board exam sa kursong Criminology.
Giingong sa buy bust operation, nisuway kini og sukol sa mga operatiba nga maoy hinungdan nga ilang napusilan.
Nadakpan usab ang giingong mga nagsuyop sa giingong drug den nga silang Kendall Taboada 38, lumad nga taga Toledo City; Juanito Pescadero, 47, taga Tagonol, Cogon Pardo, usa ka taxi driver; Jun Lasco, 33; Riolito Abella, 31; ug Michael Labra, 47, taga barangay Guadalupe.
Nakaikyas ang laing suspek nga si Danilo Rica, alyas Lolong.
Nakurat si Ruiz sa bag-ong klase sa ilegal nga drugas kay di sama sa naandan nga shabu nga puti ang color.
Nagtuo siya nga dunay laing nag supply sa ilegal nga drugas dinhi sa Sugbo.
Wa usab nila wad-a ang posibilidad nga dunay nag luto og shabu dinhi mao nga ila nang gipasusi.
“Kini nga quality I could say there is an attempt nga naay mga grupo that is trying to maybe manufaccture locally or maybe nagkuwang sila og chemical para ma purify gyud siya,” matod ni Ruiz.
Iya kining gihulagway nga ubos og kalidad.
Giangkon sa lima ka mga dinakpan nga didto sila sa lugar atol sa gihimong ronda sa PDEA-7.
Ang shabu mobalor og P600,000.
Si Juanito Pescadero nga usa ka taxi driver, nitug-an nga padung na unta siya nga mosuyop apan kalit lang nangabot ang mga operatiba ug nakuhaan siya ug usa ka putos sa gituohang shabu.
Migintang lang og 30 minutos ang ilang operation sa B. Aranas diin laing buy operation ang gihimo sa Tres de Abril sa syudad sa Sugbo.
Niresulta kini sa pagkasikop ni Rhea May Iñego 26, kanhi cashier sa usa ka mall sa syudad.
Apan si Rhea May hugot nga mihimakak nga iya ang shabu nga moabot sa P300,000 sanglit wa siya mosulod sa ilegal nga negosyo.
Matod niya nga igo ra siya nga naninda og sarisari dihang nangabot ang mga sakop sa PDEA 7 ug gisulod ang iyang balay.