Lantugi sa mga katahap
PANAHON ni Gov. Gwen Garcia number one premiere province ang Sugbo sumala sa National Competitiveness Council of the Phil. Human sa iyang termino nagbilin og minilyon sa bangko, general fund, special education fund, trust fund, disaster fund ug P28.1 B nga assets. Walay utang sa bangko gawas sa bayranan sa walay putol nga mga serbisyo ug proyekto. Nabaniog nga kugihan. Apan mga kritiko mipatugbaw sa politikanhong isyo nga adunay anomaliya ang pagpalit sa Balili Estate ug katukoran sa Cebu International Convention Center (CICC). Ang 24.7 ektaryang luna sa magtiayong Balili napalit sa kapitolyo og P98.9M sa 2008. Tag P400 matag metro kwadrado nga nakabentaha kon itandi sa appraisal committee nga P610, zonal value nga P2,320 ug market value nga P3,000P5,000. Fishpond kaniadto apan kay wala matagad sa tag-iya nahulpa hinungdan nga dunay bahin nga nasanapan sa dagat. Sa 1972 pinasikad sa Presidential Decree no. 43 ni Pres. Ferdinand Marcos nagmando nga patitulohan ang tanang fishpond pagpalambo sa fishery industry. Daghang nakapatitulo lakip na sa banayng Balili sa Tinaan, Naga, banayng Mendoza sa 70.07 ektaryang fishpond sa Silot Bay, Pob., Liloan ug daghan pa. Gibulingan ang maayong katuyoan gumikan lagi sa politika. Samtang natukod ang P850M nga CICC sa 2007 sa north reclamation sa Mandaue sa WTG Construction nga maoy nakadaog sa subasta. Lain sab ang mga kabtangan nga gipalit ubos sa Limited Source o Selective Bidding base sa Republic Act 9184 o direktang invitation-to-bid. Nalihian ang maong proyekto sa kalibotanong 12th Asean Summit. Bantayog o landmark ang CICC nga dili angayng pasipad-an og baligya. Gimansahan ang maong proyekto gumikan gihapon sa politika.
Sa pamunoan ni Gov. Junjun Davide dili malalis ang kaligdong ug kabuotan. Nagpabiling adunahan ang lalawigan basi sa 2015 COA Annual Financial Report nga P28.53B nga assets sama gihapon sa panahon ni Gwen nga gisundan sa Rizal, Negros Occ., Laguna, Negros Or., Pangasinan, Cavite, Batangas, Leyte ug Pampanga. Sayo sa miaging tuig natagak ang probinsya sa Sugbo sa ikatulong dapit diin gilupig sa Davao del Sur ug Misamis Or. sumala sa National Competitiveness Council of the Phil. Nakamansa ni Davide ang iyang mga sinaligan ug dili makalihay sa command responsibility. Ginadiling drugas sa CPDRC naghitak human itudlo ang usa ka ex-convict nga jail consultant. Anomaloso nga pagsulod og kontrata sa Black Pearl Security Agency. Kadudahan nga fly-by-night ang manpower company nga nagsuplay og janitorial services. Katingalahan nga consultancy seminar ug masteral. Minos og kalidad ang suplay sa krudo nga sigig kaguba ang mga sakyanan. Kontrobersyal nga P252M nga heavy equipment deal tali sa Conequip nga maoy highest bidder diin sa usa lamang ka dumptruck P5.1M apan ang sister company nga Mighty Brothers Heavy Equipment namaligya sa susamang dumptruck sa kantidad nga P2.6M lamang. Gidiskasi sa gobernador ang subasta. Sa pag-usab og subasta maoy midaog ang nag- joint venture nga Conequip ug RDAK. Misalmot ang D’ Limitless Vehicles Corp. apan unsa ka tinuod nga sister company ra sa RDAK. Uban wala mointra kay giusab sa BAC ang lagda nasabtan nga dunay gipaboran. Duha ka Notice of Awards pinitsahan Dis. 17, 2015 ug Nob. 25, 2016 nahauna sa re-bidding. Morag kabayo nga giguyod sa tartanilya o kabaw nga giguyod sa balsahan. Anonymous complainant mipadangat og reklamo sa Ombudsman pinitsahan Dis. 22, 2016. Typographical error o sayop nga pag- type maoy salingkapaw nga depensa sa BAC.