Pagpangisda og tawo
MORAG sayon ang tawag sa mga unang sumusunod ni Hesus. Usa ra ka awhag, nunot dayon. Wala nay daghang kuskos-balungos. Gibiyaan dayon nila ang tanan.
Makadani gayod ang mga pulong ni Jesus: “Sunod kamo kanako ug pagahimuon ko kamo nga mga mangingisda og tawo.”
Nasayod ba ang unang sumusunod ni Jesus kon unsa gayod ang ilang tawag? Kon buot man gud hunahunaon, dili maayo ang himuon sa mangingisda ngadto sa mga isda nga motukob sa iyang paon o masikop sa iyang pukot. Patyon niya kini.
Unsa man diay gipasabot ni Jesus? Ang mangingisda modani diha sa pagsikop. Kining buhat sa pagdani maoy gipasabot sa pulong: “Mangingisda og tawo.” Ang pulong ni Jesus nga midani sa iyang unang sumusunod daw pukot nga miputos ug misakmit nilang Pedro, Andres, Juan, ug Santiago.
Ang tawag nga makadani mohatag og kinabuhi, dili kamatayon.
Lainlain ang mga pamaagi sa pagsangyaw sa Maayong Balita. Usahay molingkod si Jesus sa usa ka sakayan ug mosangyaw siya gikan didto. Ang mga unang misyonero mobasa gikan sa mga papel nga linukot aron pagsabwag sa Maayong Balita.
Gahapon nagpundok ang mga Protestante ug Katoliko alang sa usa ka “Theological Symposium” didto sa St. John XXIII High School Seminary. Naminaw sila sa duha ka tighinabi, usa Katolikong pari ug usa Protestanteng teologo.
Karong tuiga man god gihinumduman ang ika-500 nga tuig sukad sa pagsugod sa gitawag nga “Protestant Reformation.”
Kitang mga Kristohanon, gikan sa nagkalainlaing denominasyon, mas daghan ang nakalambigit nato sa usag-usa kaysa nakapabuwag kanato. Ang atong pagsangyaw sa maayong balita ni Jesus Kristo usa sa labing komun nga elemento nga nakalambigit kanato.
Magtinabangay kita sa pagpangisda sa tawo taliwala sa mga bag-ong kalihokan sa relihiyon ug sa gitawag nga sekularismo nga nagatudlo nga walay kalambigitan ang Dios sa pagpadagan sa kasamtangang kalibotan. Magtinabangay usab kita taliwala sa tanang hagit ug kalisdanan, kahigwaos sa tawo, sama sa panginahanglan sa mga kabos ug sa mga kinabuhi ug banay nga nabungkag sa adis-adis.
Kapit-bisig mga Kristohanon!