Bise mayor, mga batos gipauwanan og bala
ORMOC CITY, Leyte - Bise mayor sa lungsod sa San Jorge, probinsya sa Samar ug mga batos niini gibanhigan sa miaging adlaw.
Nahitabo ang insidente atubngan sa panimalay ni Vice Mayor Nancy Grey sa Barangay Mancol, alas 10:10 sa buntag.
Base sa pasiunang imbestigasyon, nagsakay sa Toyota Hi-Ace van si Grey uban sa iyang drayber nga si Catalino Obaob, 26 ug bodyguards nga sila Joel Costambienes, 39 ug Micheal Bollido, 40.
Diha pa atubangan sa panimalay ang van gumikan kay padung na unta kini sila sa munisipyo kay motambong sa legislative session ang bise mayor.
Wa pa makalarga ang van sa dihang kalit kining gipauwanan og bala sa wa pa mailhing mga responsable.
Nasamdan ang drayber nga si Obaob sa wa nga bahin sa tiil ug dali nga gidala sa Rural Health Unit aron matambalan.
Ang hiniusang pwersa sa kapulisan gikan sa Samar Provincial Public Safety Company, Regional Public Safety Battalion ug Philippine Army ang milusad og hot pursuit operation sa pamasin nga madakpan ang responsable.
Kaihumdoman nga niadtong Enero 31, gilabay usab og granada sa wa mailhing responsable ang duha ka balay sa magtiayong Grey.
Usa nga balay niini ang nahimutang sa Barangay Aurora ug ang sa Mancol.
Samdan sa insidente ang usa ka tigluto nga si Jimmy Mariquit ug usa ka pulis nga si PO1 Artemio Rebato kinsa na-assign nga security ni Mayor Joseph Grey.
Matod ni P/CInsp. Bella Rentuaya, spokesperson sa Police Regional Office (PRO) 8, wa pay naestablisar nga konkretong motibo ang kapulisan ug wa pay lead sa mga responsable.
Padayun ang imbestigasyon sa kapulisan sa insidente.