19 Nubain ampules nasakmit
GINANG nasakpang nisuway og palusot og 19 ka ampules sa nubain sa iyang pagbisita sa male dormitory sa Cebu City Jail (CCJ) kagahapon pasado alas 9 sa buntag.
Human sa duha ka oras, usa ka babaye nga niduaw usab sa iyang inahan nga nabilanggo sa female dormitory ang nasakpan usab nga nisuway og palusot og gamay nga sachet sa shabu.
Si Jail Senior Insp. Bryanroy Mercado, deputy jail warden sa CCJ, nibutyag nga ang searcher sa bilanggoan maoy nakabantay sa mga ampule nga gisuksok sa mga pan nga Francis.
“So, natingala siya ang pan naa may mga bangagbangag. So iyang giablihan, pagabli niya nakita ang nubain didto. So, gitanaw niya ang the rest sa mga pan puro man naay mga bangag. So, pagabli puro naay mga nubain,” asoy ni Mercado sa mga tigbalita.
Sa 19 ka ampules, usa ang aksidente nga nabuak sa pagsiksik sa searcher nga jail officer.
Matod ni Mercado, si Mary Anne Labita, 45, ug dunay duha ka mga anak, gipasaligan sa usa ka inmate nga hatagan og P1,000 bugti sa pagdala sa 20 ka mga pan nga Francis, diin usa lang ang wa suksoki.
“Basta ang sugo ra sa iyaha ihatod ang pan unya tagaan siya og kwarta. Pero seguro naa na siya'y hunahuna pud nga naa gyud tingali ni kay P1,000 gud ang ihatag sa iyaha in exchange sa pagdeliver sa pan,” saysay ni Mercado.
Si Labita, pasakaan og kasong kalapasan sa Republic Act 9165, nitugan nga nanawag niya niadtong Sabado sa gabii ang piniriso nga mahuyang nga si Rolly ug nanugon nga naay ipadala nga pan pinaagi sa iyang pagumangkon.
Siya nangangkon nga wa siya kahibalo unsay sulod tungod kay sirado ang plastic nga gisudlan sa pan.
Apan siya niangkon nga kanhi tiggamitan og ginadili nga drugas ug nagbasol sa iyang pagsanong sa tugon sa piniriso.
“Naguol kaayo ko kay ang akong anak...Suko gani kaayo siya (kapuyo) kay nagapil ko. Wa siya kahibawo nganong nisugot kuno ko,” asoy ni Labita.
Ang iyang kapuyo nadakpan niadtong 2014 ug nagatubang og kasong kalapasan sa Section 5 sa Republic Act 9165 kinsa nabilanggo sa CCJ.
Si Mercado niingon ang bilanggo nga nagpadala ni Labita nagatubang usab og kasong may kalambigitan sa ginadili nga drugas.
Ang nasakmit nga ampules sa nubain iduso sa Philippine Drug Enforcement Agency aron pagsusi kon nubain ba kini.