15 anyos gilugos sa Dutch national

(Napatik sa Superbalita CDO, Pebrero 4, 2017)

USA ka Dutch national ang giakusahan nga nilugos sa menor de edad didto sa Apollo Street, Barangay Macasandig ning siyudad sa Cagayan de Oro.

Nasikop si Willem Johannes, 68, adunay kaipon ug kasamtangang nagpuyo sa nahisgutang dapit ug nagpuyo usab sa Cebu City kinsa usa ka Nederlanse/ Dutch national samtang ang biktima nailang si Shella (di tinuod nga ngalan), 15, taga Butuan City.

Gibutyag ni P/ SInsp. Julius Saluta, hepe sa Police Station 9 (PS9) sa Macasandig sa pakighinabi sa Sun.Star Superbalita, nga nagpakitabang ang biktima kauban ang igsuon niini sa ilang buhatan hinungdan sa pagkasikop sa suspek.

Gibutyag ni Saluta basi sa ilang imbestigasyon nga nagkaila ang suspek ug ang menor de edad pinaagi sa social media ug nagkasabot nga magkita sa siyudad sa giabangan nga apartment sa maong suspek.

Pag-abot sa apartment naguban sa usa ka lawak ang igsuon niini nga 21 anyos ug ang biktima apan sa dihang mibiya una ang igsuon kay misud sa bathroom ug nabilin ang duha kalit lang nga gibira sa suspek ang menor de edad. Giingong gihuboan sa suspek sa iyang gisuot ang biktima ug gitabunan ang baba ug malampusong nalugos gumikan kay di na kini makalihok tungod na usab sa kusog sa suspek.

“Ang nahitabo man gud niana niadtong mga alas 10:30 sa kagabhion ang biktima uban sa iyang maguwang ug usa ka concern citizen miari sa opisina nagpatabang nga kadto kunong 15 anyos nga babae girape daw kuno sa isa ka foreigner,” pahayag ni Saluta.

Nasayran nga positibo sa resulta sa medical sa biktima nga adunay laceration ang pribado niini nga parte sa lawas.

AREGLO

Samtang giklaro ni Saluta nga way nahitabo nga pagsuway og areglo sa kaso ug gani ila dayon nga gipasaka ang kaso ngadto sa fiscal’s office ug gipahibawo ngadto kang si CSWD Teddy Sabugaa kalabot na sa hitabo.

“Akong gipahibawo si Teddy Sabugaa sa CSWD bahin niini, for whatever support kay minor raba na, niingon pa gale ko nga Sir basin duna kay ikabatang aning foreigner nang- rape og minor sir, basin duna kay mga abogado diha sir tabangi mi diri sa opisina, ang kaso gi- file namo pagkahapon, gi- file namo ditso ang kaso, tuana sa fiscal’s office,” pahayag ni Saluta.

Gidugang pa niini nga ilang gipasaka ang kaso nga Rape in relation to Violation of RA 7610 batok sa maong suspek.

Samtang ang dinakpan nagdumili sa paghatag sa iyang pahayag kinsa nagtingkagol na karong mga panahona sa minicell sa PS9.

Ang biktima ang kasamtangang anaa sa tinugyanan sa City Social Welfare and Development (CSWD) alang sa tukmang disposasiyon.