Kalamidad di matagna

ANG Superbalita Cebu miduyog sa kasub-anan sa atong kaigsuonan sa dakbayan sa Surigao ug Caraga Region nga naigo sa kusog nga linog niadtong Biyernes sa gabii, diin mikabat na sa unom ka mga tawo ang namatay ug kapin sa 100 ang angol.

Samtang, minilyon nga kantidad sa mga kabtangan ug importanting mga inprastraktura sa kagamhanan ang nangadaut tungod sa 6.7 magnitude nga linog nga gikatahong tectonic ang sinugdanan.

Nanginahanglan sila karon sa atong dinaliang pisikal ug pinansiyal nga tabang, pagkaon, ug labi na sa pag-ampo nga makabangon dayon sa makalilisang ug makaluluoy nga epekto sa kalamidad.

Sa makausa pa, ang nahitabo sa Surigao laing pasidaan kanato nga ang kalamidad kalit lang moabot ug walay igong pasidaan busa kanunay masurprisa ang komunidad sama sa gidangantan sa Surigao ug ubang dapit.

Ang kagamhanan, human sa mga nag-unang kalamidad, daan nang nilusad sa Project Noah sa pagtumbok sa mga dapit sa nasod nga risgo sa kalamidad tungod sa linog, baha, pagdahili sa yuta ug uban pa. Gani, ang Surigao nalista sa risgo sa bagyo kay nag-atubang kini sa Pasipiko ug linog human doul kini sa Philippine trench ug fault.

Tuod man natumbok na kini daan sa kagamhanan apan dili gihapon masayran kon kanus-a moabot ang katalagman human nga mugna sa lihok sa kinaiyahan diin walay igong gahom ang katawhan sa pagsanta sa iyang kamangtas.

Hinuon, ang mahimo sa labing lantip nga tawo uban sa modernong teknolohiya mao ang paghimo sa sistema sa makanunayong pagpakabana ug pagpangandam dili lang sa pagpalig-on sa mga instraktura, importantew kaayo ang edukasyon ug organisadong komunidad sa pagtubang sa emerhensiya.