Malipayong pagsaulog sa gugma
BISPERAS karon sa adlaw sa gugma. Daghan na ang mga sugilanon nga atong nadungog ug nabasa mahitungod sa dakong selebrasyon ugma nga mao ang Valentines Day. Doble ang selebrasyon kay sumad sa ilang adlaw nga natawhan. Duna sa’y msgsaulog sa ilang anibersaryo sa kasal. Siguro duna sa’y magpakasal ugma paghimong halandumon sa tibuok nilang kinabuhi sa petsa 14 ning bulana.
Basin duna sa’y magsaulog ning maong petsa kay naatol nga gidawat ang ilang gugma nga gihalad ngadto sa babaye o lalaki niadtong mga tuig nga sila mga single. O, ang maong petsa magpahinumdum sa ilang kapakyasan kay giatol pud nha Valentines Day nga sila gibuwagan sa uyab, bana o asawa.
Pero alang sa mga overseas Filipino worker (OFW) pagka nindot unta kung ang selebrasyon naa sa ilang kiliran ang ilang mga minahal sa kinabuhi. Pananglit ang usa ka anak nga gimingaw na kaayo sa uyang papa o mama nga tua magtrabaho sa gawas sa nasod. Pagka nindot kaha sa pinitik sa kasing kasing sa atong kaigsoonan nga mahpaabot ugma sa ilang mga minahal nga moabot didto sa airport. Pagka nindota sa ilang Valentines Day.
OSPITAL
Ako nga nakapuyo og ospital sud sa duha ka semaa tungod sa pagka-admit sa akong pinanggang Anne, nanghinaot ug nag-ampo nga bisan sa gihambin nga balatian magmalipayon unta ang mga pasyente. Isip kabahin sa selebrasyon ugma nagtuo ko nga pagduaw sa mga masakiton sa sulod ug gawas sa tambalanan dako kaayo ug kahulugan alang sa nga hingtungdan. Kung duna mo’y mga kaliwat ug higala nga masakiton mas nindot nga iapil ninyo sa selebrasyon ugma pinaagi sa pagbisita nila. Sigurado ko nga di matukib nga kalipay ang bati-on sa mga masakiton. Kung madala lang sa oras labi na kay tingklase ug tingtrabaho man sab ugma.
PRISO
Ang atong mga bilanggoan duna ba’y espesyal nga kalihukan ugma?
Kung may dalaw ugma siguradong magbaha ang mga bisita. Mao sab ni ang petsa nga gipaabot sa atong mga igsoon nga piniriso. Nahinumdum ko sa segment sa programa sa telebisyon kaniadto diin usa ko sa mga nagdumala. Giulohan ang segment og Takna sa mga Binilanggo. Kausa matag semana mobisita ang reporter ug ubos sa pagpakigalayon sa jail management moatubang sa camera ang piniriso ug manawagan ngadto sa iyang mga minahal sa kinabuhi. Mas daghan ang nanawagan nga bisitahon sila sa ilang ginikanan, igsoon ug kaparentihan. Sa pagka tinuod, dunay daghan kanila ang nakalimtan nalang ug wala na mahinumdumi sa uban sa pagbisita. Kadto nga segment epiktibo kaayo kay daghan man ang wa masayod nga dunay nag-antos sa kamingaw didto.
KABUBUT-ON
Ang lain nga paagi sa selebrasyon sa adlaw sa kasing kasing mao ang pagpinasayloay ngadto sa mga tawo nga dunay gihambin nga kaguol o kasuko. Siguro tungod sa ka kulang sa komunikasyon dunay kasing kasing nga nagdugo. Dunay nahiubos. Kung madala ug hilot , mas nindot nga mahitabo kini. Gawas sa paglitok sa mga pulong nga Happy Valentines Day, pwede sab nga apilan ug mga pulong nga I’m Sorry.