The way I love you
SA misunod nga mga adlaw kanunay nang malipayon si Joy. Dasig gyud kaayo siya. Kanang mag-estoryahay mi sa sulod sa among kuwarto sa di pa mi matulog inig kagabii, way laing gibida niya nako kondi si Leo.
Parehas karon. Morag wa batiag katulugon si Joy. Lawom na gung gabii ug nagduka na ko. Tandu-tanduon ko na lang siya.
“Si Leo na gyud ang laki para nako, Kareen. Gibugtian ko sab sa akong kamatinud-anon ang iyang love nako.”
“Bitaw, uy, Joy. Kamo gyud ang para sa usag usa.” Kapiyungon na gyud ang akong mga mata.
“Na, pangita gyud og laki nga parehas kang Leo, Kareen. Buotan ug matinud-anon nga magmahal.”
Nagsigeg sulti si Joy. Wa na ko magtingog. Hangtod nga nakatulog ko. Pagka buntag, nagkuyog na sab mi si Joy sa pagpaingon sa eskol. Pagsulod namo sa school campus, midiretso si Joy sa gym. Mitan-aw siya sa praktis nila ni Leo og volleyball. Di gyud sipyaton sa akong half-sister ang pagtan-aw sa mga duwa ni Leo, mapraktis man o ma- tournament sa isig ka eskol.
Nagtuo ko nga smooth na ang pagminahalay sa duha. Apan usa ka gabii, nahiabot sa balay si Joy nga naghilak. Una kong nahiabot niya. Nagpamahid siya sa iyang mga luha ug nagyawyaw sa kasuko samtang pinabundak ang iyang sampot nga milingkod sa ngilit sa iyang kama. Gilabay man lang gani niya ang iyang school bag sa ibabaw sa iyang kama. “Naunsa ka, Joy?” Nahibulong gyud ko. “Si Leo! Nasakpan nakong dunay gikaestoryang laing estudyanteng babaye sa library.”
Nagminatay sa paghilak si Joy. Mora gyud siyag namatyan. Mitupad kog lingkod niya.
“Sus, estorya man lang kaha? Library gud., natural lang nga magtupad paglingkod ang tua sa sulod. Natural lang nga magkaestoryahay.”
“Basta lain gyud ang akong pagtuo. Uyab gyud niya tong bayhana. Magkinataw-anay gud sila.”
“Naa ka na sab ana, Joy. Gihukman na sab dayon nimo si Leo. Klaroha una, uy, kon tinuod ba nang imong pagtuo una mo siya hukmi. Unsa man, giaway mo na sab siya sa atubangan sa maong girl?”
“Unsa man diay? Giaway gyud nako siya. Di kay siya ra, giapil ko sab og away ang babaye. Baga gyud og nawong! Mangilog og laki nga dunay girlfriend!” Nakapanglingu-lingo na lang ko. Miginhawa kog lawom. “Pakig-estoryahi siya, Kareen. Ingna nga nasuko gyud ko niya!” Mitando na lang ko. Ug pagka ugma, gipakigsultihan ko si Leo. (TAPUSON SUNOD GULA)