Phone jammers itaod sa Marso

POSIBLING itaod na sa Cebu City Government ang upat ka highpower cellular phone jammers sa di pa mahuman ang buwan sa Marso.

Kini ang gibutyag ni Konsehal Dave Tumulak, chairman sa committee on public order and safety ug deputy mayor for police matters, human giaprobahan ni mayor Tomas Osmeña ang iyang hangyo.

Ang upat ka signal phone jammer nagkantidad og P980,000 kansang pundo kuhaon gikan sa Pagcor funds nga kontrolado sa buhatan sa mayor.

Susihon usab og maayo sa City Government atol unya sa ipahigayon nga public bidding nga ang specification sa signal jammer aron maseguro nga di usab maapektuhan ang kasikbit nga mga lugar nga adunay mga tawo nga nagpuyo.

Matod ni Tumulak nga sa naasoyng paagi, wa nay komunikasyon ang mga piniriso ilabi na kadtong mga high profile inmate kinsa napriso gumikan sa kaso sa ilegal nga drugas kinsa ilang gituohan nga nagpadayon sa ilang illegal nga kalihukan pinaagi sa cellphone.

Ang New City Jail kanhi Bagong Buhay Rehabilitation Center (BBRC) gironda sa niaging tuig og nakuhaan og P4.6 milyones nga kwarta ug ubang mga kontrabando sama sa illegal drugs, cell phone ug mahait nga hinagiban.

Nakadawat usab og report si Tumulak nga adunay inmate sa City Jail nga adunay access sa internet ug gituohan nga air-conditioned pa ang higdaanan base sa mga ‘selfie’ nga hulagway nga anaa sa iyang Facebook account.

Gawas sa pagwagtang sa signal, ang konsehal mopasar usab og ordinansahon sa sunod nga session nga magdili sa mga BJMP personnel, staff ug mga piniriso nga makadala og cellphone sud sa prisohan o opisina. PAC